«Ұлы Жеңістің ұрпақтары» тақырыбындағы кеште барлық жанр бойынша өнерпаздар өнер көрсетті. Әрине, еліміз көпұлтты мемлекет. Бұл ретте өнер мектебінің бишілері қазақ биімен қатар, бірнеше ұлт өкілінің халықтық шығармасын орындады. Кәсіби деңгейде вокал сыныбында дәріс алатын әншілер әуелете ән шырқады. Күмбірлеген күйдің құдіреті көпшіліктің делебесін қоздырды. Қобыз бен скрипка, сырнай мен пианино аспабының шеберлері шоқтығы биік өнердің мәртебесін арттырды.

– Аудандық өнер мектебі 1972 жылы ашылып, осы уақытқа дейін білім ошағын 700-ден аса түлек бітіріп шықты. Биыл қазақтың ұлы ақыны Абай Құнанбаевтың 180 жылдығы, Халық қаһарманы Нұрғиса Тілендиевтің 100 жылдығы, Сыр елінің бас қаласы Қызылорда қаласының еліміздің астанасы болғанына 100 жыл және Ұлы Жеңістің 80 жылдығы кеңінен аталып өтілуде. Айтулы жыл аясында аудан өнерпаздары орасан зор жетістікке қол жеткізуде. Осы оқу жылында өнер мектебі мен 4 филиалда 356 бала білім алуда. Оның ішінде, биыл 38 бала бітіруші түлек атанып отыр. Кәсіби біліктілігі жоғары 31 ұстаздың тәлімін алған шәкірттеріміз үкілеген үмітіміз саналады, – деді аудандық өнер мектебінің директоры Марат Сәдуақас.

Облыстық, республикалық, халықаралық дәрежедегі әрбір өнерпаздың қашанда болашағы жарқын. Жас ақын Нұрмұхаммед Мансұров көпшілікке арнау өлең жолдады. Оркестр ұжымы соғыс жылдарында жарыққа шыққан «Катюша» шығармасын орындап, кешті қорытындылады.