Жұлдыздай жарқыраған – Балауса

Аудандық мә­де­ниет үйінде «Балауса» халықтық би ансамбілінің «Биімен шуақ шашқан Балауса» атты шығармашылық есеп беру концерті өтті. Жылдағы дәс­түрмен ұйымдастырылатын есеп беру концертіне келген көрерменнің би тобына деген құрметі ерекше.

Сыр өңірінің мәдениет саласының дамуына өз үлесін қосып келе жатқан би тобына биыл 23 жыл толып отыр. Есеп беру концертіне ата-аналар мен №35 мектеп-лицей оқушылары қол­дау білдіріп келді. Өнер ұжымы шығар­машылық кештің шымылдығын «Қазақ» биімен ашты. Сонымен қатар «Вальс», «Домбыра», «Карнавал» биі, ұлттық биден «Өзбек», «Испан» биін нақышына келтіріп орындады. Мұнан бөлек, өнерпаздар «Гном», «Заманауи» биімен көрерменнің ыстық ықы­ла­сына бөленді. Сондай-ақ топ мүшесі Айшабибі Шырынхан жеке орындау­да өзбек биімен өз өнерін көрсетті. Концерттік бағдарлама аудан­­ның жас таланттарының әсем әнімен, күм­бірлеген күйімен әрлене түсті. Есепті концерт барысында мың бұралған бишілердің өнеріне көрермендер тәнті болып, қошеметін, құрметін аяма­ды. Би мен әсем әнмен өрілген концерт­тік бағдарламаға жинал­ған­дар үлкен рухани қуат алды. Айта кетейік, концерттік бағдарлама №36 Ә.Тәжібаев атындағы мектеп-лицейінде жалғасын тапты.

– «Балауса» би тобы халықтық ұжым болғандықтан жылына бір рет есеп беру концертін өткіземіз. Биыл жылдың басына жоспарланып, өткізіп отырмыз. Есеп беру кешіне аудан орталығындағы мектептердің оқушы­ларын шақырған болатынбыз. Өйткені оқушылардың би өнеріне деген қызығушылығын арттыру, сы­нып­тас­тарының өнерін қолдау мақ­сатында аудандық білім бөлімімен алдын ала келісілді. Шығармашылық кешке қол­дау көрсетіп, атсалысқан аудандық білім бөліміне, №35 И.Тоқтыбаев атын­дағы мектеп-лицейіне, №36 Ә.Тәжібаев атындағы мектеп-ли­цейі­не ризашылығымызды біл­діреміз, – дей­ді ұжымның жетекшісі Ақмарал Пернебаева.

Қазіргі таңда «Балауса» халықтық би ансамбілінің құрамында 60 өнерпаз өнер көрсетеді. Бағы мен бабы қатар шауып, өнер айдынында еркін жүзген би тобының жетекшісі, балетмейстері Ақмарал Пернебаева, хореографы Таңшолпан Құдабаеваның еңбегі ұшан теңіз. 23 жылдан бері сахнаның көркіне айналған бишілер тобы халықаралық, республикалық, облыс­тық байқаулардың жеңімпазы атанып келеді. Ұлттық өнерді би арқылы насихаттауда ансамбіл Қызыл­ор­да облысында республикалық «Jas­star» балалар, жасөспірімдер және жас­тар фестиваль-конкурсында үлкен топ өнерпаздары «Заманауи» би мен үздік өнерлерін көрсетіп бірінші орын, «SUMMER DANCE» «TANM ART» ХХ рес­пуб­ликалық өнер байқауында кіші топ өнерпаздары «Заманауи» биімен бас жүлде иеленген болатын.

Өнерде жұлдызы жанған «Балау­са» халықтық би тобының шығар­­ма­шы­лығына табыс тілейміз. Жұл­дыздай жар­қырай бер, Балауса!

Таңшолпан ШАНЖАРХАНОВА