Өнер мектебі – таланттар шеберханасы

Тәуелсіздік­­тің 30 жыл­ды­ғы мерейлі мереке­сі аясында аудандық өнер мектебінің «Ән-жырым саған – Тәуелсіз елім» тақырыбында кон­­цер­­ті өткізілді. Шығармашылық кешке аудан әкімі Мұрат Ергеш­­баев, аудандық мәслихат хатшысы Ержан Әжікенов, аудан­дық Қоғамдық кеңес төрағасы Марат Омаров, аудан әкімінің орынбасарлары, дербес бөлім басшылары, білім саласының ардагерлері мен мамандары, кеш қонақтары қатысты.

Шығармашылық кеш өнер мектебінің оқушылары мен ұстаздарынан құралған ұлттық аспаптар оркестрінің орындауында Құрманғазының «Балбырауын» кү­йімен басталды. Өз кезегінде домбырашылар тобы көпшілікке «Күй тартысымен» ерекшеленді. Бұдан кейін дәстүрлі ән шеберлері Арайлым Оразбае­ва, Еңлік Ибрагим, Нұрахмет Мансұров ән шырқап, арнау өлең оқыды. Өнерлі өрендер мен ұстаздар құрметіне аудан әкімі М.Ергешбаевтың ықылас гүлі сахнаға шығарылды. ІІ рес­публи­ка­лық телевизиялық «Айгөлек» өнер бай­қа­уының лауреаты «Тұмар» биші­лер тобы «Қазақ» биін биледі. Ал А.Құнан­байұлының 175 жылдығына арнал­ған «Құлақтан кіріп бойды алар» атты рес­публикалық өнер байқауының бас жүлде иегері Меруерт Ертаева ұстазы Шара Нұрадинова мен Салима Усманованың сүйемелдеуімен «Көктем» шығармасын, орыс ұлтының халық әндеріне жазыл­ған варияцияларды облыстық жас музы­кант­тар байқауының лауреаты Инабат Қайратқызы ұстазы Роза Арғынбаеваның сүйемелдеуімен орындады. Халықаралық өнер байқауларының лауреаттары аға­йынды Нұралы, Бейбарыс Бакишев пен Нұрасыл Сәдуақасовтың баян аспабымен орындаған шығармалары көпшілік көңілінен шығып, қошеметке бөленді.

Бүгінде ауданға қарасты төрт елді мекенде өнер мектебінің филиалдары жұмыс жасайды. Негізінен, Қалжан ахун, Асқар Тоқмағамбетов, Сәкен Сейфуллин, Қоғалыкөл елді мекендерінде музы­ка өнеріне баулитын ұстаздар қатары жеткілікті. Көрермендерге Қалжан ахун ауы­­лының «Назкерім» би тобы татар биін, Динаның күйі «Науысқыны» II Халық­аралық «Жас толқын» өнер байқауы­ның лауреаты «Балауса» домбырашылар ансамблі орындады. Сондай-ақ, «Этюд» шығармасымен республикалық «Атадан мұра» өнер байқауының бас жүлде иегері Данил Семенов, «Маленький негрятенок» шығармасымен об­лыстық «Весенняя капель» пианисттер байқауының жеңімпазы Аяна Тұранова ерекше өнер көрсетті. Ал «Сәлем саған, туған жер» әнін Нұрай Сәдуақасова шырқады. Ерекше қойылымға толы түрік биін «Тұмар» бишілер тобы биледі.

Кеш барысында өнер мектебінің әр жылдардағы түлектері өз шығарма­шы­лығымен танылды. Мәселен, Мәншүк Мәметова атындағы жоғары педаго­ги­калық колледжінің мұғалімі Жандос Сансызбай «Астория», Қазанғап атындағы Қызылорда музыкалық колледжінің сту­денті Бақберген Қуанышұлы «Левитанинг» шығармаларын орындады. Шығар­машылық кешті «Мәңгілік ел» әнімен арнайы вокалдық топ қорытындылады.

– Өнер мектебінің ұжымы «Ән-жырым саған – Тәуелсіз елім» тақырыбындағы есеп беру кешіне жыл бойы дайындық жүргізді. Пандемия уақытында шәкірт­теріміз онлайн және офлайн байқауларда топ жарды. Осыған дейінгі уақытта ұстаз­дарымыз шәкірттерімізге музыка өнерінің қыр-сырын үйретіп, қабілетін шыңдауда. Кеш барысында әлемдік дәрежеде орын­далатын шығармалар арнайы таң­далып алынды. Көрерменнің оқу­шы­ларымыздың шын талантын бағалап, қол­дау көрсеткені қуантады. Бұл ретте, көпшіліктің алдында жақсы өнер көрсету үшін ұстаздар мен оқушыларға зор жауапкершілік жүктеледі, – деді аудандық өнер мектебінің директоры Марат Сәдуақас.

Айта кету керек, аудандық өнер мек­тебінің іргетасы 1972 жылы қаланып, осы кезеңге дейін аталған мектепті 700-ге жуық түлек бітіріп шыққан. Олар бүгінде еліміздің түкпір-түкпірінде өнер мен білім секілді салаларда еңбек етіп, ел өркендеуіне сүбелі үлестерін қосып келеді.

Балтабай ОРДАБЕКОВ