Тілші мен тәртіп сақшысының бір күні
![](/uploads/posts/2023-09/medium/1693893416_53e7b207-0969-4b9e-a247-3b4e0a85009d.jpg)
Ең алдымен, аудандық полиция бөлімі басшысының міндетін атқарушы, полиция подполковнигі Азамат Оспановтың қабылдауында болып, күні бүгінге дейін атқарылған жұмыстардың мән-жайына қанықтық. Кездесуде сан бағытқа бөлінген аудандық полиция бөлімінің жұмысы қай кезде де қауырт екеніне тағы бір мәрте көз жеткіздік. Бұдан кейін қырағы қасиетімен тәртіп бұзушылықтың алдын алатын полиция қызметкерлерінің кезекті жұмыс күніне арналған дайындық барынша пысықталды. Бұл ретте, тәртіп сақшылары қызметтік қаруды жасақтап, автокөліктің май-суын тексерді.
Өз кезегінде аудандық полиция бөлімі басшысының міндетін атқарушы, полиция подполковнигі А.Оспанов пен «Жергілікті полиция» бөлімшесінің басшысы, полиция майоры Қ.Көшекбаев жиын өткізіп, күнделікті жүзеге асырылатын қызмет бөлінісін сала мамандарына таныстырды. Тереңөзек кенті бойынша 5 бағытта кезекшілік атқаратын 16 тәртіп сақшысының қатарына біз де қосылған едік. «Жергілікті полиция» бөлімшесіне қарасты патрульдік полиция тобының қызмет инспекторы, полиция аға лейтенанты О.Доспановпен бірге тәртіп бұзушылықтың алдын алу үшін жұмыс жасадық.
Заманауи бағытта жасақталған автокөлік сала мамандарына оңтайлы етіп жабдықталған. Арнайы планшеттің көмегімен көлік жүргізушілерінің заң бұзушылықтарға жол бергендігін дер кезінде анықтауға болады. Енді жол бұзғандарға салынатын айыпұл мен жауапкершілік туралы айтып өтейік.
Негізінен, жаяу жүргіншілер рұқсат етілмеген жолды кесіп өтсе, 6900 теңге мөлшерде айыппұл төлейді. Аталған заң бұзушылық қайталанып немесе бұдан біреу зардап шеккен жағдайда 34500 теңге көлемінде айыппұл салынады. Ал, көлік тізгіндеген кез келген тұлға сағатына 10-нан 20 км дейінгі шамаға арттыру 5 АЕК, яғни, 17250 теңге, сағатына 20-дан 40 км дейін 10 АЕК немесе 34500 теңге, сағатына 40 км және одан да көп шамадан тыс арттыру жағдайы бір жыл ішінде қайталанса 30 АЕК көлемінде 130500 теңге мөлшерде айыппұл салынады. Сонымен қатар жүргізуші рөлде отырып, телефонды немесе радиостанцияны пайдаланған мезетте 17250 теңге көлемінде айыппұл арқалайды. Аталған әрекет бір жыл ішінде қайталанса, айыппұл сомасы 34500 теңгені құрайды. Осы ретте, жүргізуші қауіпсіздік белдігін тақпаған кезде және жолаушыларды, жүктерді тасымалдау, мотошлемдерді пайдалану қағидасын сақтамағанда 5 АЕК көлемінде 17250 теңге айыппұл иесі атанады. Біз көп төленетін айыппұл мөлшерлерін назарларыңызға ұсындық. Ішімдікті тұтынып, көлік басқарған жүргізушіге жаза қатаңдатылғанын да ескеруіміз қажет.
Әрі қарайғы сапарымыз кент көшелерінде жалғасты. Көше бойында қарбалас тіршілік. Тереңөзек кентінің орталық көшесі саналатын Аманкелді Имановтан бастап, Қонысбек Қазантаев, Иса Тоқтыбаев бағытын аралап көрген едік. Мәселен, Иса Тоқтыбаев көшесінің бойында бір автокөлік тоқтатылып, иесіне түсіндірме жұмысы жүргізілді. Ал, Қонысбек Қазантаев көшесінде электронды мопед айдап келе жатқан жасөспірімге жол ережесінің негізгі талаптары жөнінде кеңінен айтылды. Тәртіп сақшылары 5 бағыт бойынша осы күні 71 хаттама толтырып, ескерту, айыппұл салу секілді бірнеше жаза түрлерін азаматтарға қолданды. Оның бәрі заң аясында жүргізілгеніне біз де куә болдық.
Журналистік зерттеу барысында республикалық «Құқық тәртібі» жедел-профилактикалық іс-шарасы өткізіліп жатқандығын тәртіп сақшылары біздің назарымызға салды. Үш күнге созылған іс-шара барысында жекелеген азаматтарға 91 хаттама толтырылған.
Айта кетейік, «Учаске» жедел-профилактикалық іс-шарасы 1 ай көлемінде жалғасын табады. «Автомобиль» іс-шарасы да, 1 айға жуық уақытта жол жүру ережелерін өрескел бұзған азаматтарды анықтауға арналады. Тәртіп сақшылары жекелеген автокөлік иелерін тексеру барысында суық қару сақтаған кент тұрғынын анықтаған. «Учаске» жедел-профилактикалық іс-шарасы шеңберінде ҚР ӘҚБтК-нің 482 бабының 1-бөлігімен жергілікті тұрғынға суық қару сақтағаны үшін хаттама толтырып, құжаты сотқа жолданды. Полиция қызметкерлері қырағылық танытып, аудан аумағындағы саяжайдың бірінде тұратын азаматтан есірткіге жататын хош иісті өсімдік тәркіледі.
Расында, әрбір қызметтің қиыншылығы бар. Біз көрген тәртіп сақшысының бір күні сан түрлі оқиғамен тап келеді. Ішімдікке масайған кісі, зорлық-зомбылыққа тап болған отбасы мүшесі, бөтеннің мүлкіне қол салған ұрлықшы, жол ережесін бұзған жүргізушімен бетпе-бет келетін сала мамандарының жұмысына сәттілік тілейміз.
Балтабай ОРДАБЕКОВ