Термешілер байқауы өтті

Халқымыздың өткен тарихында таңды таңға ұрып, тыңдарманын ұйы­тып тыңдатып, құлақ құрышын қандырған термешілер көп болған. Сондықтан қазақ халқы сөздің маржаны мен ойдың тұнығынан та­ғылым тартып, жұртшылықты адалдық пен әділдікке, тазалық пен иман­дылыққа тәрбиелейтін термені «текті сөздің төресі» деп бағалаған. Өнер­дің бұл жанры қазақ халық поэзиясында белгілі бір жүйеге түсіп қалыптасқан әрі өзіндік тыңдарманы бар өлең түрі болып саналады.

Термешілердің шығармашылығын насихаттау мен қолдау мақсатындағы жұмыстардың жан­дануына Елбасының «Рухани жаңғыру» бағдар­ламалық мақаласы көп септігін тигізді. Соның негізінде термешілердің республикалық байқауы ұйымдастырылып, өлең-жырға шөліркеген ха­лықтың айызы қанып, рухани қазынаға кенелді. Міне, осынау игі істі ауданымыздағы үлгілі ауыл саналатын Нағи Ілиясов ауылдық мәдениет үйі қолға алып, төл өнерді та­ғы да төрге оздырды. Атап айтқанда, «Абзал және К» толық серіктестігінің демеушілігімен термешілердің облыстық байқа­уы ұйымдастырылды.

Айдынды Арал мен қарт Қаратау аралы­ғындағы аймақтағы жеті ауданнан түгел дерлік талапкерлер қатысқан байқау тақыры­бы «Тә­уелсіздікке тарту» деп аталды. Н.Ілия­сов ауылдық мәдениет үйінің директоры Н.Тұра­новтың айтуынша, ауданда термешілер бай­қа­уы­ның ұйымдастырылмағанына бірнеше жыл болған екен.

– Жалпы, біздің ауданда ақындар, әнші­лер, бишілер және сазгерлер арасындағы шығар­машылық байқаулар тұрақты түрде өткізіліп ке­леді. Біз бұл жолы термешілер арасында байқау өткізіп, термешілік өнердің тынысының кеңеюіне қолдау көрсеткіміз келді. Ұлттық дәстүр мен салт-сана тағылымын жастардың бойына дарытып, жас ұрпақтың жан-жүйесін оятуда дәстүрлі өнердің алатын орны ерекше. Әсіресе, ғибрат­тық мәні бар идеяларды теріп айтатын термешілік өнердің өз биігі, өз тыңдаушысы бар. Тұңғыш Президенттің «Рухани жаңғыру» бағдарламасы аясында және Тәуелсіздіктің 30 жылдығына орай ұйымдастырылған байқау жыршылық-тер­мешілік өнерге жаңаша серпін беру арқылы әдеби тілді дамытуға, тіл мәдениетін жетілдіруге үлес қосады деп сенеміз, – дейді Н.Тұранов.

Облыстық байқауға өлең-сөздің қадірін бі­летін білікті мамандар қазылық етті. Атап айт­қанда, талапкерлердің шығармашылығын жырау Марат Сүгірбай, Аманкелді ауылындағы өнер мектебінің директоры Мейрамбек Абдуллаев, ақын, Қазақстан Жазушылар одағының мүшесі Ақтөре Ибрагимұлы бағалады. Қазылар алқасы шығарманың тереңдігіне, мәні мен мазмұнына, дауыс мақамы мен орындалу шеберлігіне, тіл тазалығы мен сахна мәдениетіне баса назар аударды. Нәтижесінде, аралдық Гүлжамал Бейісова бас жүлдеге лайықты деп танылды. Жүлделі бірінші орынды сырдариялық Алмат Өтеуов иеленсе, екінші орынмен қармақшылық Тоғжан Бақытова марапатталды. Ал үшінші орын Н.Ілиясов ауылының атынан қатысқан Ботакөз Қалиасқароваға берілді. Қалған қатысушылар ынталандыру сыйлықтарына ие болды.

А.ҚҰРМАНАЙТЕГІ