Байқаудың бас жүлдесі – Сырдарияда

Елбасы Н.Ә.Назарбаевтың «Болашаққа бағдар: рухани жаңғыру» бағ­дар­ламалық мақаласы аясында ұлы ақын Абай Құнанбайұлының 175 жыл­дығына орай «Асыл сөзді іздесең, Абайды оқы, ерінбе» атты көркемсөз оқу шеберлерінің облыстық онлайн байқауы өтті. қазалы ауданында ұйымдастырылған облыстық байқауға қатысып, бақ сынаған сырдариялық гүлзат аманкелдиева бас жүлде иеленді.
Байқауда Абай Құнанбайұлының өмір жолы мен нақыл сөздері таныстырылды. Жастарды өлең­ді мәнерлеп оқуға машықтандыру мен олар­дың шығармашылық қабілеттерін дамытуды мақсат еткен байқауда қатысушылар көркем шығармаларды жатқа оқып, өз шеберліктерін көрсетті.
Облыстық деңгейде ұйымдастырылған шығар­машылық байқау екі кезең бойынша өрбіді. Бірінші кезең «Абай айтқан асылдар» деп аталып, онда талапкер­лер ақын шығармаларындағы білім, ғылым және өнер тақырыптарында өрілген поэзиялық туындылар мен қара сөздерді мәнерлеп оқыды. Ал, екінші кезеңде талапкерлер ұлы ақынды әлемге танытқан көрнекті жазушы М.Әуезовтің «Абай жолы» романынан үзінді оқыды.
Талапкерлердің өнерін «Қазалы» газетінің бас редакторы, Қазақстан Журналистер одағының мүшесі Есет Табынбаев, «Өнеге» әжелер ан­самблінің мүшесі, актриса Ұлжан Ахметова, ҚР мәдениет саласының үздігі Ғалия Оспанова баға­лады. Қазылар алқасының шешімі бойынша екі кезеңде де үздік деп танылған сырдариялық Гүлзат Аманкелдиева облыстық байқаудың бас жүлдесін иеленді.
Көркем сөз оқу шебері Гүлзат Талғатқызы Н.Ілиясов ауылындағы №132 Т.Айтбаев атындағы мектепте ұстаздық қызмет атқарып келеді. Бала күнінен көркемсөз оқуға дағдыланып, қазақ ақын­дарының өлеңдерін жатқа оқитын жас маман бүгінгі күнге дейін көптеген байқаудың жеңімпазы атанған. Өнерге құштар жас бұл жолғы байқауда А.Құнанбайұлының жиырма тоғызыншы қара сөзі мен жазушы М.Әуезовтің «Абай жолы» роман-эпопеясынан үзіндіні жатқа мәнерлеп оқыды.

Б.ЖАНӘЛІ