«Жауынгер жолы» фильмі көрсетілді

Бүгін Кеңес Одағының Батыры Нағи Ілиясовтың 100 жылдығына орай Н.Ілиясов ауылында «Жауынгер жолы» фильмі көрсетілді.

Шара басында қаһарман батырдың өміріне қатысты «Ерлік пен еңбек жолы ұрпаққа» тақырыбымен көрме жұмысы таныстырылды. Онда жауынгердің отбасымен түскен фотосуреттері, ерліктері жазылған кітаптар, соғыстан кейінгі өмірі туралы ақпараттар қамтылған.

Кеңес Одағының батырына арналған шарада аудан әкімінің орынбасары Д.Байдушев, аудандық ардагерлер кеңесінің төрағасы Х.Әбенұлы, батырдың ұлы Р.Ілиясов, ауылдық ардагерлер кеңесінің төрағасы Ж.Төребекұлы сөз сөйлеп, батырдың ерлік істері мен ел үшін жасаған еселі еңбегін атап өтті.

– Биыл сырдариялық қаһарман Нағи Ілиясовтың 100 жылдық мерейтойын атап өтудеміз. Бұл біз үшін маңызды мерейтой. Өйткені, қан майданда ерен ерліктің үлгісін көрсетіп, Отан үшін жан аямай соғысқан батырға құрмет көрсету – кейінгі ұрпақтың парызы екені сөзсіз. Ерлігімен танылған жауынгер соғыстан кейінгі жылдары ел дамуына еселі еңбек етті. Сол арқылы оның есімі тарих беттерінде алтын әріптермен жазылып қалды. Биылғы жылы 100 жылдық мерейтойға байланысты карантиндік талаптарды сақтай отырып, онлайн шаларар өткізіліп келеді. Бұл өскелең ұрпақтың батырға деген құрметінің белгісі, – деді аудан әкімінің орынбасары Димаш Байдушев.

Сөз кезегінде батырдың ұлы Ринат Ілиясов қаһарманның өмір жолына тоқталса, аудандық ардагерлер кеңесінің төрағасы Х.Әбенұлы мен ауылдық ардагерлер кеңесінің төрағасы Ж.Төребекұлы естеліктерімен бөлісті.

Мұнан кейін ауыл тұрғындарына «Жауынгер жолы» екі бөлімді деректі фильмі көрсетілді.

Ұлы Жеңістің 75 жылдығы аясында түсірілген фильмде даңқты батырдың өмір жолы мен ерлік шежіресі баяндалған. Бірінші бөлімде Нағи Ілиясовтың балалық шағы мен соғыстағы ерлігі көрсетілсе, екінші бөлімде соғыстан кейінгі еңбек жолы, қиындықты еңсеру кезеңдері, өңірдің дамуына қосқан үлесі қамтылған.