Тіршілік тынысы Tirshilik-tynysy.kz ақпараттық агенттігі
» » Бірлесе атқарған жұмыс нәтижелі болады

Бірлесе атқарған жұмыс нәтижелі болады

Аудандық мәслихаттың кезектен тыс V сессиясы өтіп, оған аудандық мәслихат төрағасы Е.Әжікенов төрағалық етті. Сессия жұмысына аудан әкімі Б.Сәрменбаев, аудан әкімінің орынбасарлары, кент және ауылдық округ әкім­дері, бөлім басшылары мен БАҚ өкiлдерi қатысты.

Сессияның күн тәртібінде 5 мәселе қа­ралды. Оның біріншісі – «Сырдария ау­­­­да­нының кент және ауылдық округ­те­рінің 2023-2025 жылдарға арналған бюд­жеттері туралы» Сырдария аудан­дық мәслихатының 2022 жылғы 22 желтоқ­сандағы №185 шешіміне өзгерістер енгізу туралы болып, аудандық экономика және қаржы бөлімінің басшысы Е.Ахетов хабарлама жасады. Сондай-ақ екінші және үшінші мәселе – адамдарды заңсыз әкетуге, әкелуге және сатуға қарсы күрес мәселелері жөніндегі аудандық комиссия құрамын бекіту туралы және қылмыстық жазаларды және өзге де қылмыстық-құ­қықтық ықпал ету шараларын орындайтын мекемелер мен органдардың қызметіне жәрдемдесу, сондай-ақ қылмыстық жазаларын өтеген адамдарға әлеуметтік жә­не өзге де көмекті ұйымдастыру бо­йынша жергілікті атқарушы органдардың жанындағы консультациялық-кеңесші орган құрамын бекіту туралы. Бұған қатысты аудандық жұмыспен қамту, әлеуметтік бағдарламалар және хал актілерін тіркеу бөлімінің басшысы М.Қаратаев баяндады.

Ал кезектен тыс сессияда күн тәрті­біндегі төртінші және бесінші мәселеге негізгі басымдық берілді. Ол ауданда «Ауыл – ел бесігі» бағдарламасының орында­луы және ауданда «Ауыл аманаты» жо­ба­сының іске асырылу барысы туралы болды. Осы жұмыстардың атқары­луы­на қатысты аудан әкімінің орынбасары Т.Нұртазаев хабарлама жасады.

Аудан әкімінің орынбасары алдымен «Ауыл – ел бесігі» бағдарламасының жү­зеге асуына тоқталды. Бұл бағдар­лама шеңберінде ауылдық елді мекендер­дегі әлеуметтік және инженерлік инфрақұры­лымдарды дамыту, ол бойынша іс-шара­ларды іске асыру бағытында жыл сайын біршама жұмыстар атқарылып жатқанын тілге тиек етті. Мәселен, 2021 жылы бюджеттен 812,5 млн теңге қаржы бөлініп, Тереңөзек кентінде, Ақжарма және А.Тоқ­ма­ғамбетов ауылдарында 8 нысан бойынша жұмыстар жүргізілген. Сонымен қатар 2022 жылы бюджеттен 850,2 млн теңге қаржы қаралып, Тереңөзек кентінде, Ақ­жарма және Н.Ілиясов ауылдарында 11 нысан жұмысы жүйелі атқарылған.

Ал биыл «Ауыл – ел бесігі» бағ­дарламасымен ауданда 22 нысан­ бойынша бюджеттен барлығы 2037,0 млн теңге қаржы бөлінген. Атап айтқанда, Аманкелді ауылдық ок­ру­­гіндегі Жанкина, Жалмұрзаева, Ағай­даров, Баймағанбетов, Қалым­бетов көшелерінің автомобиль жолдарын орташа жөндеу және елді мекенді электрмен жабдықтау жұ­мыстары жүргізілетін болады. Сонымен бірге Қоғалыкөл ауылындағы М.Шоқай көшесі мен тұйығында ор­таша жөндеу және М.Есмаханов, А.Тілеулиева көшелерінің бойындағы су құбыры мен көру құдықтарының құрылыс жұмыстары атқарылмақ. Шір­кейлі елді Қ.Қожамжаров және Бей­бітшілік көшелерін орташа жөн­деу жұмыстары іске асатын болса, Шаған ауылдық округіне құны 1363,0 млн теңгені құрайтын 3 жобаға 305,9 млн теңге бөлінген. Оған Шағандағы тұрғын аймақтарды электрмен қам­ту жұмысын бастауға 150,0 млн тең­ге (өтпелі жоба), А.Құнанбаев, Р.Оразғалиева көшелеріне 48,8 млн теңге, Ғ.Мұратбаев, А.Иманов және А.Иманов жолақ көшелері бойындағы су құбыры мен көру құдықтарының құрылысын бастауға 107,1 млн теңге (өтпелі жоба) қаралып отыр.

Бұдан бөлек, Қалжан ахун елді ме­кенінде құны 330,6 млн теңге­ні құ­рай­тын газ құбырлары және квар­­тал­ішілік газ құбырлары желі­сінің құрылысы жүзеге асырылуда. Ал аудан орталығы саналатын Тереңөзек кенті бойынша 11 жо­­ба­ға 548,3 млн теңге бөлініпті. Терең­өзек кентінде бағдарлама ая­сын­да Қ.Бөдеев, Д.Қонаев, Ә.Тоқма­ғамбетов, Ә.Тәжібаев, А.Әлиакбаров, Б.Өтепов, Т.Қозыбаев көшелерінің автомобиль жолдарына орташа жөн­деу, «Сырдария спорт клубы» КММ-нің ғимаратына күрделі жөн­деу, «Ботакөз №6 бөбекжай» ғима­ра­­тының бу қазандықтарын газ оты­­нына қайта жабдықтау, Сырдария ауданының орталық аудандық ау­руханасы оңалту бөлімшесінің қа­зандығы ғимаратын реконструкция­­лау жұмыстарына қаражат қа­рал­ған. Бүгінде 22 нысанның 14-і бо­йын­ша мердігерлер анықталып, жұ­­­мыс­тары басталуда.

– Жалпы айта кету керек, аудан бойынша 14 елді мекеннің 5-еуі (Те­реңөзек кенті, Н.Ілиясов, Ша­ған, Ақжарма, Шіркейлі) тіректі, 5 елді мекен (Амангелді, Қоғалыкөл, Қалжан ахун, С.Сейфуллин, А.Тоқ­мағамбетов) спутникті санатқа жатады. Ал қалған 4 ауылдық округ (Айдарлы, Жетікөл, Бесарық, Ің­кәрдария) тіректі мен спутникті елді мекенге жатпайды. Бұған қатысты жылына бір рет ҚР Ұлттық экономика министрлігінің мониторингіне сәйкес қорытынды шығады. Онда тіректі мен спутникті елді мекендер нақталанады. Айта кету керек, «Ауыл – ел бесігі» бағдарламасы бойынша тіректі мен спутникті елді мекендерге қаржы бөлінеді, – деді аудан әкімінің орынбасары.

Осы мәселеге қатысты депутаттар тарапынан сауалдар туындады. Аудандық мәслихат төрағасы Ержан Әжі­кенов «Ауыл – ел бесігі» бағ­дар­ламасының халыққа жағдай жа­сауға берілген жақсы мүмкіндік екенін жет­кізді. Үкімет тарапынан елді ме­кендерді көркейтіп, гүлдендіруге қо­­мақты қаржы бөлінгенде оларды игеруге, түрлі жобаларды жүзеге асы­руға келгенде бірқатар ауылда жұмыстар тиісті деңгейде жүргі­зілмеуде. Бұған қатысты жақында ауданға жасаған жұмыс сапарында облыс әкімі Н.Нәлібаев ауыл әкім­­деріне арнайы ескерту жасап, шекті уақыт берген болатын. Осыны назарға салған аудандық мәслихат төр­ағасы Іңкәрдария, Айдарлы, Же­тікөл, Бесарық, А.Тоқмағамбетов, С.Сей­­фуллин ауылдарының әкімдерін тұр­ғызып, мемлекеттік бағдарлама бо­­­­йынша жобаларды ұсынып, ауыл­дар­дан сайланған депутаттармен бір­­ге бірлесе жұмыс жасау керектігін айтты.

– Біз ауыл әкімдерінің мәселесін қарап жатқан жоқпыз. Біз осы ауданды дамытуға қатысты ортақ мүд­дені талқыға салып жатырмыз. Бұған атқарушы билікпен бірге ау­дандық мәслихат депутаттары да тікелей жауапты. Бұл – біздің бірлесе атқаратын жұмысымыз. Өйткені, ауданды дамыту, елді мекендерді көр­кейту – баршамызға ортақ жұмыс. Сондықтан депутаттар мен ауыл әкімдері бірле­се жұмыс жасап, ин­фрақұрылымдық жұмыстарға және тұрғындардың мә­селе­лерін шешуге қатысты жұмыс­тарды бастапқы орынға қойып, жобалар әзірлеп, «Ауыл – ел бесігі» бағ­дарламасының игілі­гін көруіміз ке­рек, – деді Ержан Ертарғынұлы.

Мұнан соң аудан әкімінің орынбасары Т.Нұртазаев 2,5 пайыздық несие­мен берілетін «Ауыл аманаты» жобасына қатысты да ақпарат берді.

Бұл жоба халық табысын арт­тыруға арналған. Бұған облыстық бюджеттен 3 млрд қаржы бөлініп, об­лыстық ауыл шаруашылығы және жер қатынастары басқармасы арқылы «Ауыл тұрғындарының табысын арттыру жөніндегі жобаны ауқымдау шеңберінде берілетін микрокредит­тер» сенім білдірілген өкілді анықтау мақсатында мемлекеттік сатып алу жұмыстары жүргізілуде. Жобаны қаржыландыру басталған жоқ. Десе де, ауданда түсіндірме жұмыс­тары жүргізілген. Соған байланыс­ты аудан бойынша жобаларды қалып­тастыру мақсатында 2 млрд 330 млн теңгеге (344 жоба) жоспар жи­нақталған. «Ауыл аманаты» жобасын іске асыру және қызығушылық танытқан кәсіпкерлерді сүйемелдеу мақсатында аудан әкімінің өкімімен жұмысшы тобы құрылған. Аталған топ қызығушылық танытқан кәсіпкер­лерді құжаттарын сүйемелдеу үшін «Атамекен» кәсіпкерлер пала­та­сы­ның аудандық филиал ғимара­тында мамандар жұмыс істеуде.

Бұған қатысты да аудандық мәс­лихат төрағасы жұмысты жандандыру керектігін, тұрғындарға «Ауыл аманаты» жобасының тиімділігі мол екенін түсіндіріп, ақпараттандыру қа­­жеттігін атады. Яғни, кент және ауылдық округтерден көптеген жобалар ұсынылып, мемлекеттен бөлініп жатқан қаражат арқылы тұрғындар табысының артуына мол мүмкіндік жасау керектігін жеткізді.

Сессияның күн тәртібінде осы екі мәселе – «Ауыл – ел бесігі» бағдар­ламасы мен «Ауыл аманаты» жобасына негізгі басымдық берілді. Күн тәртібіндегі мәселелер қаралғаннан кейін аудан әкімі Б.Сәрменбаев сөз сөйлеп, халық қалаулылары мен бөлімдер және ауыл әкімдері бір­лесе жұмыс жасау керектігін айтты. Бірлесе атқарған жұмыс нәтижелі болатынын атап, қазіргідей мүмкіндік барда мемлекеттік бағдарламалар ар­­қылы барлық мәселені шешіп алу қа­жеттігін жеткізді.

Сессияның күн тәртібіндегі бар­лық мәселе қаралып, тиісті шешімдер шығарылды.


Е.БЕРКІНБАЕВ
27 мамыр 2023 ж. 154 0