Жер-жерге хат-хабар, сәлемдеме, газет-журнал жеткізу үшін пошта қызметін тұтынатынымыз белгілі. Одан бөлек, ай сайынғы зейнетақы, жәрдемақы секілді қаржы аударымдары да осы сала арқылы жүргізіледі. Заман қаншалықты жедел ілгерілесе де бұл байланыс саласы ауқымы кең қызметтерді атқарып, тұрғындарға тиімді, сапалы қызмет көр­сетуде. Осы орайда, «Қазпошта» АҚ-ның Қызылорда ОФ Сырдария АПБТ бастығы Ғ.Кенжебаевпен сұхбаттасып, атқарылып жатқан жұмыстар жайын білдік.
– Ғалымжан Арыстанбекұлы, аудандық пошта байланыс торабына басшылыққа жаңадан келіп жатырсыз. Алдымен, осы салада атқарылып жат­қан жұмыстарды айтып берсеңіз?
– Зейнетақы мен жәрдемақы бе­ретін орталық, газет-журнал жет­кі­зу­ші, хат-хабар, сәлемдеме жіберу-алуда «Қазпошта» – қала мен ауылды жалғап тұрған көпір. Еліміздегі ең ірі компаниялардың бірі – ауқымды қаржы ұйымы саналады. Сондықтан мұнда халықпен тығыз жұмыс жасалады, тұр­ғындарға тиімді қызмет көр­сетіледі.
Ауданға келгелі бері жұмыс сапасын арттыруға қөңіл бөлініп, нақтылы шаралар жасалуда. Атап айтар болсам, аудандағы көптеген мекеме қыз­меткерлерінің жалақысын осы пош­та арқылы алуды жүзеге асырудамыз. Қазірдің өзінде аудандық сот, аудандық әділет басқармасы, аудандық кірістер басқармасы, аудандық ішкі істер бөлімі қызметкерлері пошта қыз­метін тұтынуда. Алдағы уақытта ауылдық әкімдіктермен, мектептермен осы бағытта жұмыс жасау жоспарда. Мұның тиімділігі сол, поштадан жалақы алынғанда пайызы төмен, сондай-ақ, ауыл ішінде қолжетімді. Сонымен бірге, «Хоум банк», «Альфа банк» және «Азия Кредит банктен» 13,5 пайыздан басталатын несие рәсімдеуге мүмкіндіктер қарастырылған.
Пошта саласы баспасөзге жазылу, тарату жұмыстарын жүргізетіні белгілі. Бүгінгі таңда аудандық поштада басылымға жазылу жүйелі жүргізіліп, ІІ жартыжылдық нәтижесінде жос­парлы жұмыс артығымен орындалды. Атап айтқанда, 132 пайызға орындалып, Сырдария ауданы аймақта бірінші орынға шықты. Бұл пошта қызметкерлерінің жұмыла жұмыс жаса­ғанының жемісі.
– Қазір барлық саланы цифр­ландыру жүргізілуде. Осы тұста, пошта байланысын тиімді ету тұр­ғысындағы жұмыстарды айтып өтсеңіз?
– Мекеменің қызмет аясын кеңейту және халықаралық ұйымдарға қосылу, электрондық коммерциямен және «Қаз­пошта» қызметтерін цифрландыру­мен байланысты инновациялық жобалар жүзеге асырылуда. Соның аясында барлық қызмет электронды жүйеге көшіп, жұмыс жүйелілігі артып отыр. Егер бұрын адамдар байланыс бөлімшесіне тек сәлемдемелер мен хаттарды жіберу немесе алу үшін келетін болса, қазіргі уақытта «Қазпоштаға» коммуналдық төлемдерді төлеу, несие­ні өтеу, депозиттегі шотты толтыру, төлем картасын ашу немесе ақша аудару үшін келетін болды. Аталған қыз­меттердің барлығы онлайн режимде қолжетімді. Бұл бөлімшелердегі кезекті азайтуға және тұтынушыларға қолайлы жағдай жасауға мүмкіндік беруде. Электрондық коммерцияның дамуына байланысты сәлемдемелер саны да артып келеді.
– Жалпы, поштада қандай қыз­меттер көрсетіледі?
– Қаржымен тікелей жұмыс жасайтын ұйым болғандықтан пошта байланыс саласынан әлеуметтік төлемдерді алуға болады. Атап айтқанда, мүмкіндігі шектеулі жандарға, асыраушысынан айырылғандарға, жас ерекшеліктеріне қарай, мемлекеттік арнайы жәрдем­ақылар, ҰОС ардагерлеріне, мүгедек­теріне, теңестірілген тұлғаларға, мү­ге­дектеріне теңестірілген тұлғалар­ға, соғыста жесір қалғандар мен ҰОС мерт болғандарға берілетін жәрдем­ақыларды поштадан алуға болады. Сонымен қатар, зейнеткерлерді жерлеуге арналған, мемлекеттік әлеуметтік және арнайы жәрдемақы алушылары, жерас­ты және ашық тауларда жұмыс жасаушыларды, еңбектің ең ауыр және зиянды шарттарында жұмыс жасаған адамдарды жерлеуге берілетін жәрдемақы беріледі. Жалпы айтқанда, мүмкіндігі шектеулі жандарға, балаларға, көп балалы аналарға, оралмандарға және басқа да әлеуметтік төлемдер осы жерде жүргізіледі. Одан бөлек, «Қазпошта» АҚ қаржылық қызметтері де жетерлік. Мәселен, коммуналдық және басқа да қызмет түрлеріне, мобильдік қызмет түрлеріне, әлеуметтік медициналық сақтандыру қорына, зейнетақы жарналарына, әлеуметтік шығындарға, «Oriflame», «Avon», «МФО КМF», «Кредит 24» серіктестіктеріне төлемдер қабылданады. Оған қоса, ағымдағы шоттарды толықтыру, агенттік қызмет­тер, несиелік төлемдер, депозиттерді толықтыру, ақша аударымдары, электронды кошелек және ағымдағы шоттарды ашу жұмыстары да жүргізіледі. Бұл қызметтер поштаның барлық бөлім­шесінде көрсетіледі.
– Биыл «Қазпошта» АҚ-ның 25 жылдығы екені белгілі. Айтулы жылы көптеген шара өткізіліп жатыр. Осыған тоқталып өтсеңіз?
– Иә, 1993 жылдың 5 сәуірінде Тә­уелсіз Қазақстанда алғашқы қазақ поштасы құрылып, ресми түрде мем­лекеттік мәртебе алды. Биыл жұмыс ауқымы кең саланың 25 жылдық мерейтойы. Осыған орай, аймағымызда бірнеше акция өткізілуде. Тоқталып өтер болсам, жыл бойы «Сенім» акция­­сы ұйымдастырылуда. Бұл зейнетақы аударуға арналған банк шоттарына, сондай-ақ, зейнетақы аудару үшін тө­лем карточкалары пайдаланылатын банк шоттарына арналған. Оның барысында шот ашқан зейнетақы алушы коммуналдық қызметті тегін жасайды. Алушының бір ЖСН арқылы айына кемінде 3 коммуналдық түбіртекті комиссиясыз төлеуге мүмкіндігі бар.
Одан кейін «Kazpost сыйлықтары жылы» акциясы үстіміздегі жылдың 1 сәуірі мен 30 қыркүйегі аралығында өтізіліп жатыр. Мұнда зейнетақы мен жәрдемақы қызметі бойынша ағым­дағы немесе төлем картасында ақша қаражаты аударылған болуы тиіс. Ұтыс ойыны аяқталғанға дейін 6 күнтізбелік ай ішінде тұрмыстық техника сатып алу үшін 8 сертификаттың бірін ұтып алу мүмкіндігі берілмек.
Сондай-ақ, «Аударым үшін планшет» (1 наурыз-25 желтоқсан), «Ali­Express» (15 маусым-31 тамыз), «Wes­­tern Union. Өз заманыңның жаңа­лы­ғы­­на жаршы бол!» (1 мамыр-31 тамыз) акциясы тиісті талапарға сай ұйым­дастырылуда. Бұл акциялар не­гі­зін­де ұтыстар ойнатылып, жеңім­паз­дарға бағалы сыйлықтар табысталатын болады.
– Сұхбатыңызға рахмет!