Әңгіме барысында ақынның аяулы қызы әкесінің мерейтойын атап өтіп, шығармашылығы жөнінде кеңінен ой өрбітті. Аякөз апай Ұлы Отан соғы­сындағы жеңіске 80 жыл толуы аясында бауыры жөнінде басылым бетіне мақала жариялауды ұсынды. Бұл ретте, ақынның ұлы Төребек Тоқмағамбетов хақында қалам тер­беуді жөн көрдік.

Негізінен, Төребек Тоқмағамбетов әкесі секілді өлең өлкесінде өзіндік қолтаңбасын қалдырған талантты ақын. Мектеп қабырғасында оқып жүрген сәттен тереңнен ой қозғап, өлеңнің құдіретін сезіне білген. Әкесі­нің тәлімін ала жүріп, дарынды екенін көпшілікке таныта білген. Алғыр қасиетінің арқасында көптеген түйткілді мәселені тарқатып, сықақ, сатиралық өлеңімен есімі әйгілі болды. Оның бірнеше балауса жыры «Октябрь балалары» газетіне үзбей жария­ланып тұрған.

– Менің бауырым әкеміздің жолын қуды. Өмір жолы тым қысқа болғанына қарамастан, есімі елге белгілі зиялы қауым өкілдеріне қабілетін мойындата алды. Төребек ағамның өлеңдерімен танысқан ақын-жазушылар әкеме оны Алматы қаласына ауыстыруды сұрайды. Осылайша талантты ақын әсем қаладағы №12 орта мектепке ауы­­сып, сол жерден білім алады. 18 жасында өзі соғысқа сұранып, майдан даласына аттанады. Кезекті кескілескен соғыс барысында кеудесін оққа тосып, бақилық болды. Азғантай ғұмырында ел есінде қалатын өлең жазып кетті. Ағамның өлеңдері «Майданнан хат», «Жыр – аманат» кітаптарына енді, – деді Аякөз Асқарқызы.

«Боламын ертең командир,

Киемін мен де сұр шинель.

Барамын бас боп майданға,

Аттандырса сүйген ел», – деп жырлаған Төребек Асқарұлы Отан үшін, ел үшін жаумен соғысты. Жақында «Egemen Qazaqstan» газетінде Қанат Бірлікұлының «Майданда шейіт кеткен шайырлар» тақы­рыбында ма­қаласы жарық көрді. Мақалада біздің жерлесіміздің де есімі аталған.