Магистрлер клубының алғашқы жиынына аудандық білім бөлімінің қызметкерлері, мектеп-лицей арда­герлері, мектеп директорларының бағдарлы оқыту жөніндегі орынбасарлары қатысты.

– Мамандық таңдау – бала өмірін­дегі маңызды қадам екені белгілі. Сондықтан біз кәсіби мамандар – магистрлер арқылы бағыт-бағдар беру, заманауи әдіс-тәсілдерді көр­сету, ата-ана-оқушы-мұғалім «үш­­тік одақ» бірлескенде ғана бе­лгілі бір жетістікке жетуге болатынын көрсету, түсіндіру, кеңес беру мақсатын қойдық. Клуб жұмысын 17 магистр-мұғалім 4 топқа бөлініп жүргізеді. Жұмыс жоспары бекітіліп, ғылыми жобаға, пәндік олимпиадаға, халықаралық оқушы қабілетін ба­ғалау бағдарламасы байқауына, ҰБТ-ға дайындық, жас мамандарға әдістемелік көмек сынды бағыттарға бөлініп жұмыс жасайды. Магистрлерден жасақталған клуб жоспарға сәйкес әр айға бөлініп, оқушылар парламенті мен озат тәжірибе мектебі мамандарымен бірлесіп жүргізетін болады, – дейді «Жұлдыз» магистрлер клубының жұмысын үйлестіруші, мектеп-лицей директорының бейіндік оқыту жөніндегі орынбасары Гүлмира Байдушева.

Иә, магистр дегеніміз – жоғары кәсіби білімі бар, белгілі бір білімге негізделген, ұшқыр ойлы, білім мен ғылымды ұштастыра білетін білікті ұстаз. Клуб ұйымдастырушысының айтуынша, болашақта әлеуметтік серік­тестік негізінде кенттегі мектептердегі, Жалағаш ауданы магистрлерімен бірлесіп коучинг, шеберлік сыныбы, танымдық ойындар сынды жұмыс түрлерін көрсету жоспарланған.

Мемлекет басшысы Ұлттық құрылтайда белгілеп берген «Адал адам – адал еңбек – адал табыс» қағидатын насихаттау, біртұтас тәр­бие бағдарламасындағы ата-ана әлеуетін арттыруға клуб магистрлері өз үлесін қосатын болады. Сонымен қатар тәрбиелік мәні зор іс-шарада биылғы жылдың «Жұмысшы мамандықтар жылы» деп жариялануына байланысты магистрлердің жұмыс барысы, сахналық қойылым, домбырашылар оркестрінің өнері, көр­кемөнерпаздардың концерті көрер­мен назарына ұсынылды.

Кездесу соңында мектеп-лицей директоры А.Әлиева қорытындылап, ата-аналарға алғысын білдірді.