Отбасылық кәсіп – ортақ нәсіп

Атадан балаға мұра болып қалатан отбасылық кәсіп елімізде бизнестің негізгі қозғаушы күші. Қазіргі таңда ауданымызда отбасылық бизнесті шыр айналдырып отырған кәсіп иелері жетерлік. Сондай-ақ отбасылық жеке кәсібін дөңгелетемін дегендерге де мүмкіндіктер көп. Тек кез келген істің тетігін тауып, дамыта білсе болғаны.

Сәкен Сейфуллин ауы­лын­дағы Бақышовтар отбасы бүгінде азық-түлік дүкенін ашып, саудамен айналысып келеді. Ауыл тұрғындарының игілігіне ашылған сауда орны «Айбегім» деп аталады. Тұрақты тұтынушылары қалыптасқан дү­кеннің сөресінен азық-түлік­тен бастап, тұрмысқа қа­жетті тауарлардың барлығын табуға болады. Ұсақ-түйек зат, азық-түліктің сан алуан түрі бар. «Отбасылық кәсіпте береке бар» демекші отбасының әр мүшесі қолы босаған сәтте дүкен шаруасын жүргізуге атсалысады.

– Дүкеніміз 2021 жылдан бастап жұмыс істеп келеді. Негізінен дүкен ашу, жеке кәсіппен айналысу балам мен келінімнің идеясы. Ата-ана әрқашан баласының тілекшісі ғой. Біз де жұбайымыз екеуіміз қолдау білдіріп, дүкеннің шаруа­сын жүргізуге көмек көрсетіп келеміз. Қазіргі таңда бір жұмыспен шектеліп отыра беруге болмайды. Қолыңнан келсе қосымша табыспен айналысқан дұрыс. Көбіне дүкенде келінім тұрады. Шүкір, дүкеніміздің тұрақты келушілері де қалып­тасты, – дейді дүкен иесі Мей­рамкүл Есекеева.

Қосымша табыс көзіне айналған отбасылық бизнес 4 жылдан бері тұтынушысына сапалы қызмет етіп келе жатыр. Дүкендегі тауар бағалары да ауыл тұрғындарының қалтасына ауырлық түсірмейтіндей қол­жетімді. Көбіне дүкенге қажетті азық-түлікті Қызылорда қала­сынан тасымалдайды. Сондай-ақ қазіргі кезде түрлі фирмалар күнделікті жеткізу қызметін ұсынатындықтан тауардың сан алуан түрін таңдауға да мүмкіндік бар екенін айтады. Ауыл тұрғындары дүкен иелерінің келген тұтынушыларды күліп қарсы алып, әр сатып алушымен әдепті түрде сөйлесе білетініне өз ризашылықтарын білдіріп жатады.

– Жаздау мен Мейрамкүл өз­дерінің еңбекқорлығының, ауыз­­біршілігінің арқасында отба­сылық бизнесті дамытып отыр. Ауылдағы үлгілі отбасылардың бірі. Дүкенге кірген сәттен жылы шыраймен қарсы алады. Дүкендегі азық-түліктің бағасы да қалта көтереді, – дейді ауыл тұрғыны Әмірбек Созақбаев.

Бүгінде Жаздау Бақышов пен Мейрамкүл Есекеева 4 бала тәрбиелеп өсірген, 5 немеренің ата-әжесі. Ұлын ұяға, қызын қияға қондырған үлгілі отбасы. Берекелі шаңырағында отбасының тірегіне айналған Жаздау Бақышов еңбек адамы. 42 жылдан бері «С.Сейфуллин Жер» серіктестігінде еңбек етіп келеді. Ал отбасының ұйытқысы болып отырған Мейрамкүл Есекеева «Ақ көгершін» бөбекжай балабақшасында жұмыс істейді. Үйдің үлкені Жандос ауыл шаруашылығы және жер қатынастары бөлімінде қызмет етуде. Жұбайы Жансаямен 3 бала тәрбиелеп отыр. Екінші қызы Жансая тұрмыста болса, үшінші қызы Айкүміс пен кенжесі Айбибі студент.

Отбасылық кәсіпте нәсіп бар деп білетін отбасына берекелі кәсіп тілейміз.

Таңшолпан ҚАЛДЫБЕКҚЫЗЫ