Кітапхана – білім көзі, кітапханашы – оның тірегі
![](/uploads/posts/2023-10/medium/1696914447_zure-maman.jpg)
Сол кезде маған бір ой келетін. «Мына кітапханашы апайлардікі, сірә неткен жақсы жұмыс. Кез келген кітап қолжетімді. Қалағаныңды ал да оқи бер. Тіпті бүкіл жұмыс уақытыңды кітап оқып өткізсең болады» деп таңданатынмын іштей. Бала көңіл анау темір жолдың арғы бетіндегі үйіме бірнеше кітапты арқалап қайтуды қиын көргені ме, әлде бірнеше кітап алғанымды місе тұтпай, көп кітаптың ортасында отырып, қалағанымды алып оқығым келе ме, әйтеуір осындай ой болатын. Бір жағынан, кітапханашының жұмысы – кітап оқу деп ойласам керек.
Сол кезден бері кітапхана мен кітапханашы апайларға жақынмын. Жақында №36 Ә.Тәжібаев атындағы мектеп-лицей жанындағы кітапхананың кітапханашысы Зәуре Үйсінбаевамен әңгіме-дүкен құрдым. Білімнің кені болған кітаптар үйінде, әдеттегідей, жүзі жылы, мейірімді апайлар жұмыс істейді. Менің бала күнгі түсінігімде солай. Білікті кітапханашымен әңгіме барысында бұл ойымның дұрыстығына тағы көзім жете түсті. Мектеп-лицей кітапханасына арнайы бас сұғып, жұмыс барысымен, кітап қорымен таныстым.
Аз-кем таныстықтан соң Зәуре Маманқызы бізбен бұрыннан таныс кісіше ақтарылып сөйлесіп кетті. Журналист те, кітапханашы да «илегені бір терінің пұшпағы» дегендей, шығармашылықтың адамдары ғой. Содан болса керек, апаймен әңгімеміз тез жарасты. Мақала арқауы етіп өз өмірін айтудан бұрын кітапханамен таныстырып, жұмысын көрсеткен кітапханашының өз ісіне беріле кіріскен жан екенін аңғардық.
– Жақында кітапханамыздағы кітап қоры 300-ге артты, – деп қуана дауыстады ол сүйіншілегендей.
– «Оқуға құштар мектеп» жобасы аясында түрлі іс-шаралар өтіп жатыр. Оқушылармен бірлесе отырып, мектепішілік байқаулар, танымдық кештер мен кездесулер ұйымдастырамыз. Әр баланың қабілеті әртүрлі ғой. Сол сияқты кітап оқуға, кітапхана жұмысына белсенділік танытатын оқушылар бар. Әрине оқушылардың барлығы дерлік кітапханаға бас сұғып, керек кітабын тауып, қажет ақпаратын алып жатады, – дейді Зәуре Үйсінбаева.
Білікті маманның балаларға деген ықыласы да ерекше екен. Кітапханаға кірген оқушыны құшақ жайып қарсы алып, жылы лебізін білдіріп шығарып салып жатты. Біз сұхбат құрып отырған аз ғана уақыттың ішінде келген оқушылардың да кітапханашы апайға ерекше еркелеп, сыйластық көрсететінін аңғардық.
Кейіпкеріміз – 1973 жылдың тумасы. Еңбек жолы 1990 жылдан бастау алыпты. Алғашқыда түрлі салада еңбек етіп, тәжірибе жинақтап, жан-жақты ысылған жас маманның 2012 жылдан бастап білім ордасындағы қызметі басталған. Алғашқыда зертханашы, тәрбиеші болып жұмыс жасай жүріп, балалармен жақсы қарым-қатынас орната білген. Жүзі жылы, жүрегі мейірімді адамға бала да үйір болады емес пе. «Адамның жақсысын бала біледі» деп жатады бұндайда. Ол – рас. Зәуре апай жаспен де, жасамыспен де тіл табыса алатын, үлкенге де, кішіге де сый-құрметін аямайтын жайдары жан. Кітапханашы мамандығын игерген ол 2017 жылдан бастап мектеп кітапханасында еңбек етіп келеді. Бүгінде өз жұмысының қыры мен сырына әбден қаныққан ол әр жұмыстың қызық та, қиын да тұстары болатынын айтады.
– Балалармен жұмыс жасаған қызық қой. Баланың энергиясы кісіні шаршатпайды. Керісінше, күш-қуат береді. «Бала тілі – бал» деген, кейде «өмірімізді ұзартып алатын» сәттер де кездеседі. Өзім де кітап оқығанды ұнатамын. Кітап – ақы сұрамайтын ақыл кені. Нағыз шынайы дос бола алатын дүние. Негізінен өзім орыс сыныбында оқығанмын. Бірақ қазақ әдебиетіне, оның ішінде поэзия жанрына деген қызығушылығым басым, – дейді кітапханашы.
Журналист болған соң, түрлі саладағы адамдармен кездесіп, тілдесіп, сұхбат құрып жатамыз. Бір сұхбат барысында-ақ кісінің қандай екенін анық аңғаруға болады. «Бойыңызда қандай қасиеттеріңіз бар, айта өтсеңіз» деген сұрағымызға мақтанып ала жөнелмей, өзіне ұнамды қасиетін ашып айта қоймаған Зәуре апай туралы пікірді жанындағы әріптестерінен сұрастырдық.
– Зәурені 2012 жылдан бері білемін. Ол кісі туралы айту керек болғанда, ең алдымен «қарапайымдылық» деген ассоциация ойыма орала қалды. Өте қарапайым әрі көпшіл жан. Қолы ашық. Сондай жарқын мінезінің арқасында көпке сыйлы. Балалар да үйір өзіне. Кітапхана жұмысына араласа бастағанына алты жыл уақыт болып қалды. Сол сәттен бері бірге жұмыс жасап келеміз. Қаншама жұмыс атқардық. Қызметте сенімді әріптес, өмірде әпкелі-сіңлілі құрбыға айналдық. Зәуре – өте еңбекқор. Әдемілікті жаны сүйеді. Әр істі жауапкершілікпен, тыңғылықты атқарады. Ол өз ісінің нағыз маманы, өте ұқыпты, шыншыл, кішіпейіл, достарына адал жан. Аялап өсірген қызы Бағжан өрісін кеңейтіп, анасына әже бақытын сыйлады. Бүгінде қос жиеннің қызығына тоймай, тілеулерін тілеп отырады. Адал еңбегі еленіп, аудандық білім бөлімінің «Құрмет грамотасына» ие болғанын, кітапханашылар күні қарсаңында арнайы марапатпен марапатталғанын да айта кету орынды,– дейді мектеп-лицей кітапханасының меңгерушісі Ләззат Ниязбекова.
А.МҰХАНБЕТҚАЛИ