Нашақорлықпен күрес – ортақ міндет

Есірткімен күрес, нашақорлықтың алдын алу – мемлекеттік саясаттың басым бағыттарының бірі. Бұл – қауіпті кеселді аса ауыр қылмыс деп бағалауға да болады. Өйткені, Мемлекет басшысы Қасым-Жомарт Тоқаев атап өткендей, есірткі жастардың жанын да, тәнін де улап жатыр. Ұлттық Құрылтайда айтылған бұл ой бәрімізді алаң­датады.

Ауданымызда «Есірткісіз ай­мақ» жобасы жүзеге асырылуда. Жобаның аты айтып тұрғандай бас­ты мақсат – есірткісіз аймаққ ай­налуды көздейді. Осы ретте Асқар Тоқмағамбетов ауылында да нақты жұмыстар жүргізілуде. Бұл бағыттағы іс-шаралар ауыл әкімінің тікелей бақылауында. Сонымен қатар үш жақты жоспар қабыл­данып, бекітілген. Жоспарда ұйымдастырылуы тиіс жұмыстар то­лық қамтылған.

Іс-шаралар жоспары аясында есірткінің зияны жөнінде түрлі та­қырыптық кездесулер ұйым­дас­тырылуда. Сондай-ақ ауыл ау­мағындағы алқаптарды аралау жұ­мыстары жүргізілуде. Аралау­ға аудандық прокуратура, аудан­дық ішкі істер бөлімінің өкілдері қатысуда. Қадағалау және құқық қорғау органының өкілдері жәй аралап қоймай, тиісті түсіндірме жұмыстарын жүргізіп, заңның қатаң­датылғанын айтып, нақты мысалдар келтіріп жүр. Бұл жұмыстарға ауыл әкімдігінің мамандары да тұрақты түрде қатысып, атқарылған жұмыстар әлеуметтік желідегі ресми парақшалар арқылы насихатталуда.

Жалпы, алғанда, есіртікі қыл­мыс­тарының алдын алу мен бол­дырмауға мемлекет қатаң шаралар қабылдауда. Түркістанда өткен Ұлттық Құрылтайдың жалпы отырысында мұны Президенттің өзі айтты.

«Мен бір нәрсеге баса назар ау­дарғым келеді. Бұл – нашақорлық. Бұл – ұлт саулығына зор қауіп төндіретін кесел. Есірткі жастардың жанын да, тәнін де улап жатыр. Біз есірткіні қолданудың, дайындаудың және таратудың жолын кесіп, тамырына балта шабуға тиіспіз. Әйтпесе, бүкіл еліміздің болашағы бұлыңғыр болады. Бұл мәселе мені қатты алаңдатады. Химиялық есірткілер нарықта кең ауқымда сатылуда. Кри­миналдық топтар жастарды осындай заңсыз әрекеттерге тартып жатыр. Қазақстан Респуб­ликасының аумағында есірткі өн­дірісі белең алып барады. Бұл – мем­лекетіміздің қауіпсіздігіне қатер төндіретін мәселе. Есірткінің таралуына қарсы күрес үшін бүкіл уәкілетті органдардың күш-жігерін біріктіру керек. Әйтпесе, жағдайды ушықтырып аламыз. Қазақстан ау­мағында синтетикалық есірткі өн­діретін орындарды түбегейлі жою үшін батыл шаралар қабылдау керек. Бұл – аса маңызды міндет» деді Мемлекет басшысы.

Президенттің тапсырмасын орын­дауға Ел Үкіметі мен жергілікті ат­қарушы органдар кірісіп кетті. Енді есірткі егіп есіріп, оны қолданып жүргендерге жаза қатаң болады. Бұл жұмыстар заң үстемдігін қамтамасыз етуді басты мақсат санайтын ауылымызда да кешенді түрде жүргізіле береді.

Г.АЛИЕВА,
А.Тоқмағамбетов ауылдық әкімі аппаратының жетекші маманы

Фото: ашық дереккөзден