Брейн-рингте – жастар
Тереңөзек кенті әкімдігі мен аудандық мәдениет және спорт бөлімінің қолдауымен, Тереңөзек кенті клубының ұйымдастыруымен «Туған жерім – тұнған шежіре» тақырыбында жастар арасында брейн-ринг сайысы өтті.Жоғарғы сынып оқушыларының бос уақытын тиімді пайдалану, білімдерін шыңдау, салт-дүстүрді білуге үйрету мақсатында өткен сайысқа аудан орталығынан 4 команда қатысты. №36 Ә.Тәжібаев атындағы мектеп-лицейдің «Тапқырлар», №35 И.Тоқтыбаев атындағы мектеп-лицейдің «Сейхун», №131 Т.Қозыбаев атындағы орта мектептің «Жалынды жастар» және №210 О.Әбілпаттаев атындағы мектеп-лицейдің «Яксарт» командалары білім бәйгесінде бақ сынады.
Сайыс 4 кезең бойынша өтіп, «Зымыран сұрақтар», «Білгенге маржан», «Суреттер сөйлейді», «Қызық екен» кезеңдерін қамтыды. Брейн-ринг ойынының шарты бойынша қойылған сұрақтарға кезек реттілігі бойынша мүдірмей, нақты жауап берілді. Жоғарғы сынып оқушылары ел тарихынан, салт-дәстүрден білімдерін көрсетіп, ұлттық құндылықтарды насихаттауда, туған жердің шежіресін білудегі ізденімпаздықтары қуантты. Осы мақсатта ұйымдастырылған «Суреттер сөйлейді» кезеңінде командалардың барлығы экранға берілген Қорқыт ата кешені, Байқоңыр ғарыш айлағы, Қожа Ахмет Яссауи кесенесі мен «Досмұқасан» ансамбілі туралы толық ақпарат білетіндіктерін көрсетті.
Нәтижесінде, сайысты сәтті аяқтаған «Жалынды жастар» командасының тапқыр жастары бірінші орынға шықты. Екінші орынды «Сейхун» командасы иеленсе, үшінші орынды «Тапқырлар» мен «Яксарт» өзара бөлісті. Командаларға диплом мен естелік сыйлық табыс етілді.
«ТТ» ақпарат
