Шәкірттері шыңға шыққан

Қазан айының алғашқы жексенбісі – мәртебелі маман­дық иелерінің мерейі артатын мереке. Бұл күн кәсіби мереке ретінде белгіленгенімен, адам баласын білім мен ілімге үйрететін аяулы жандардың әр күні мейрамға сая­ды.

«Ұстаздық еткен жалықпас, үйретуден балаға» демекші, «адам жанының бағ­баны», «мектептің жү­регі» болған ұстаз­дарымыз егемен еліміздің ұлағатты ұр­пағын қалыптастыру жолында жан аямай еңбек етуде. «Ұлылықтың басында ұстаз тұрар» деген халық даналығы. Кім болса да, ұстаздың тәлімі мен тәр­биесінің нәтижесінде азамат болып қа­лыптасатыны анық. Ендеше, еліміздің қай салада болмасын жеткен жетістігінің ұшар басында ұлағатты ұстаздардың ерен ең­бегі тұрғаны анық.

Талай шәкірттің өмірден өз орнын та­буда дұрыс бағыт-бағдар беріп, талай оқу­шының білімі мен білігін арттырып, ұстаздық жолда 20 жылдан бері абыройлы қызмет етіп жүрген Анар Арыстанбаева «Мұғалімдік – мамандықтың төресі» дейді. Анар апай жоғарғы білімді Алматы қаласындағы Қазақ мемлекеттік қыздар педагогикалық институтында алған. Бү­гінде педагог-сарапшы атағына ие ұстаз аудан орталығындағы білімнің қараша­ңырағы №210 Оспан Әбілпаттаев атын­дағы мектепте қазақ тілі мен әдебиеті пәнінен сабақ береді. Жас ұрпақты тіл­ге деген құрмет пен жанашырлыққа тәр­биелеп жүрген ұстаздың шәкірттері де бүгінде биік белестерді бағындырып жүр.

Анар Мүбаракқызы – үнемі ізденісте жү­ретін, жас ұрпақты тәрбиелеудің әр ке­зеңіне еркін ілесіп, балаларды қандай та­қырыпқа да қызықтыра алатын білікті маман. Қазіргі дамыған технология мен ақпарат дәуірінде оқытушыға да, оқушыға да мыңдаған мүмкіндік жасалып, қолдау көрсетілуде. Қазіргі заман мұғалімінен тек өз пәнінің терең білгірі болу емес, тарихи-танымдық, педагогикалық-психологиялық сауаттылық, саяси-экономикалық білім­ді­лік және ақпараттық сауаттылық талап етілуде. Ол заман талабына сай білім бе­руде жаңалыққа жаны құмар, шығар­ма­шылықпен жұмыс істеп, оқу мен тәрбие ісіне еніп, оқытудың жаңа технологиясын шебер меңгергенде ғана білігі мен білімі жоғары жетекші тұлға ретінде ұлағатты саналады.

Осы ретте, Анар апай мемлекеттік наг­радалармен де марапатталып жүр. Атап айтар болсақ, 2015 жылы ҚР Білім және ғылым министрлігі «Өрлеу» біліктілікті арттыру ұлттық орталығының «Құрмет гра­мотасымен» марапатталса, 2016 жылы «Халықаралық қазақ тілі қоғамы» қоғам­дық бірлестігінің Қызылорда облыс­тық ұйымының «Алғыс хатына» ие бол­ған. 2018 жылы Қызылорда облыс­тық білім басқармасы білім және ғылым қыз­меткерлері кәсіподағының облыстық коми­тетінің «Құрмет грамотасына» лайық деп табылған ізденімпаз ұстаз биыл Қазақстан Республикасы оқу-ағарту министрлігінің «Алғысына» ие болған. «Ұстаздан шәкірт озар» демекші, Анар Мүбәракқызының тәрбиелеген шәкірттері де түрлі сайысқа қатысып, жеңіс төрінен көрініп келеді.

– Өзім аудандағы қасиетті қарашағы­рақ №35 мектеп-лицейінен түлеп ұштым. Анар Әзқожаева, Гүлжан Әбдірәсілова сияқты білікті ұстаздардан тәлім алып, соларға қарап бой түзеп өстік. Сол кісі­лердің жолымен ұстаздықты, оның ішінде, қазақ тілі мен әдебиеті саласын таңдадым. Ақжелен Болатова, Арман Өмірғали, Аружан Келдібай, Ернар Дүйсенбай, Арайлым Асылханова, Мөлдір Жандарбек есімді дарынды оқушыларым осы салаға бағытталып, түр­лі байқаулардан жүл­делі орын алып, ата-ана мен ұстаздар мәрте­бесін арттырып, үмітті ақтап жүр, – дейді Анар апай.

Анар Арыстанбаева өзі де тәжірибе алмасып, түрлі бай­қау­ларға қатысып, жүлделі орындар ие­леніп келеді. Сонымен қоса жан-жақты ұстаздың ғылыми ма­қалалары түрлі рес­пуб­ликалық ғылыми жинақтарға енген.

Қолға қалам алып, кейіпкеріміз туралы ой толғау барысында апайдың қыз­мет­тестерінен пікір сұрап, ой бөлісуін сұра­дық.

– Анар – еңбек жолында жетіс­тік­терге жетіп, аудандық, облыстық, респуб­ли­калық сайыстарға қатысып, жүлделі орын иеленіп, шәкірттерінің жүрегінен орын ала білген тәжірибелі ұстаз. Білімді әрі білікті маман. Жан-жақты сауатты, өз ісінің шебері. Жеке қасиеттеріне тоқ­талсам, Анар – адамгершілігі мол жан. Сондай-ақ адал әріптес. Сөздің емес, істің адамы. Оқушыларға үнемі жанашырлық танытады, – деп пікір білдірді мектептің қа­зақ тілі мен әдебиеті пәнінің мұғалімі Жадыра Әкімтаева.

«Халық пен халықты, адам мен адамды теңестіретін нәрсе – білім» деп қазақтың белгілі жазушысы Мұхатр Әуезов бекер айтпаған. Еліміздің дамуы мен бо­лашақтағы бейнесі ғылым мен білім жүйесінің біртұтастығымен өлшенеді. «Бі­лек­ке сенген заманда ешкімге есе бер­медік, білімге сенген заманда қапы қа­лып жүрмелік» деген. «Қапы қалмасқа» ұстаздар қауымының атқарар қызметі мен алар орны орасан. Оларға артылар жауапкершілік те жоғары. Ендеше, түгел ұрпақты тәрбиелеуші мәртебелі тұл­ға­ларды мерейлі һәм кәсіби мерекемен құттық­тай­мыз.

Аружан МҰХАНБЕТҚАЛИ