Ортақ еңбек – ортақ абырой

Ризығын Жер-Анадан тауып, қыс бойы жерге күтім жасаса, ала жаздай егіннің бітік шы­ғуына бар ықыласын арнайтын шаруа адамы үшін күз мезгілінің маңызы зор.

Күзгі науқан жұмыстарын қорытын­ды­лайтын «Алтын дән-2021» мерекелік іс-ша­расы жылда­ғыдай жоғары деңгейде өтті. Арнайы мере­келік іс-шараға қатысқан облыс әкі­мі Гүлшара Әбдіқалықова мезгілдің сан құбылуына қара­мастан аянбай еңбек етіп, тер төккен, ауыл шаруашылығын дамытуға ерекше үлес қосқан дала еңбеккерлеріне құрмет көрсетті. Жиынға Қазақстан Респуб­ликасы Парламенті Сенатының депутаты Мұрат Бахтиярұлы, ҚР АШМ Жер ресурстарын басқару комитеті төрағасының орынбасары Гүлжахан Бимендина, қала, аудан әкім­дері, «Қазақстан Фермерлер Қауымдастығы» қоғамдық ұйымының Қызылорда филиалының төрағасы Өмірхан Пашкенов пен сала үздіктері қатысты. Озаттар қатарында ауданға қарасты Аманкелді ауылдық округінің ветпункт меңге­рушісі Н.Жүсіпов те бар.

Іс-шараға арнайы шақырумен қатысқан Нұрболат Шайхисламұлы ел байлығын еселеп, көбейту жолында жоғары көрсеткіштерге қол жеткізгені үшін арнайы «Алғыс хат» иеленді. Мерейі артқан мал шаруашылығы саласының майталманы осы салада еңбек етіп жүргеніне биыл 36 жыл толған. Шымкент қаласы, Сарыағаш ауданындағы Қапланбек аграрлық-техникалық колледжінде білім ал­ған ветеринар оқу бітірген бойда туған жерге ту тігіп, Аманкелді ауылында еңбекке араласқан. Содан бері ауылдағы мал басын сақтауда, ел экономикасы мен ахуалын көтеруде аянбай еңбек етіп келеді. Аманкелді ауылы көршілес аймақтармен салыстырғанда мал басы көп ауыл болып саналады. 2015 жылдан бастап ауылдық округте ветпункт меңгеруші қызметіне тағайындалған білігі мен білімі, тәжіри­бесі мен көргені көп маман аталған саланың өз қиындықтары бар екенін айтады.

– Биыл шаруа адамдары үшін қиын жыл болды. Жайылымдық жерлерде шөптің аз шы­ғуы малдың арық болуына, тіпті азаюына әке­ліп соқты. Оның үстіне, қажетті құрал-жаб­дықтардың уақытылы жеткізілмеуі мәселені күрде­­ле­ндіріп отырды. Десек те, жағдай солай екен деп қарап отыруға болмайды. Біз өз тарапымыз­дан қажетті жұмыстың барлығын атқаруға тырыстық. Нәтижесінде, мал басын ортайтпай, төл­дердің бәрін аман алып қал­дық, – дейді Н.Жүсіпов.

«Тәртіпке бас иген құл болмайды» деген сөзді ұстаным еткен маман өзінен де, өзгелерден де қатаң тәртіп, абыройға не­гіздеп жұмыс жүргізуді талап етеді. Соның нәтижесінде жоспарды үнемі уақытынан бұ­рын орындап отырған. Ерен еңбек пен адал қызмет бағаланып, мерейі артқан ветпункт меңгерушісі бұл жалғыз жеткен жетістігі емес­тігін айтады.

– «Жалғыздың үні шықпас» деген. Осынша шаруаны бір өзім атқармаймын. Ауылдағы ветеринарлық бөлімшеде барлығы төрт адам жұ­мыс істейміз. Қанатбек Миянов, Оразхан Ахметов, Айжан Төлеген есімді білікті мамандар ауыл халқының алғысын алып отыр. Атқарылып жатқан шаруа – ортақ еңбектің нәтижесі. Демек, озат атанып, алған марапатымыз да ортақ абыройымыз, – деп пікір білдірді Нұрболат Шайхисламұлы.

Айта кетейік, білікті маман бұған дейін де аудан, облыс көлемінде арнайы алғысқа ие болып, мерей тұғырынан көрінген.

Аружан МҰХАНБЕТҚАЛИ