Тіршілік тынысы Сырдария аудандық қоғамдық-саяси газет
» » Кәсіпкерлік дамыса, игілік еселенеді

Кәсіпкерлік дамыса, игілік еселенеді

Ауданға басшы болып келгелі бері аудан әкімі М.Ергешбаев ауылдарды аралап, ондағы кәсіпкерлік саласының дамуына ерекше мән беріп келеді. Әрбір жұмыс сапары барысында кәсіпкерлер­мен кездесіп, оларды қолдауға, кәсіптерін кеңейтуге мүмкіндік жасауда. Бұл жолғы Шіркейлі, Н.Ілиясов елді мекендеріне жасаған сапарында да жергілікті кәсіпкерлермен кездесіп, олардың жұ­мыстарымен танысты.
Жақында Мемлекет басшысы Қасым-Жомарт Тоқаев Ұлттық жобалар тізбесін бекіту туралы Жарлыққа қол қойған болатын. Онда 10 Ұлттық жоба айқындалып, соған сай жұмыстарды үйлестіру жүктелді. Солардың қатарында «Ұлттық рухани жаңғыру» жобасы бар. Бұл жобаның негізгі мақсаты – жастардың бойында ру­хани-адамгершілік құндылықтарды дарытып, елге еңбегі сіңген тұлғалар арқылы еңбекте ерлік көрсететін ұрпақтарды қа­лыптастыру. Осыған орай, Шіркейліге бар­ғанда аудан басшысы «Сырдария ауда­нының Құрметті азаматы», даңты күрішші Бексұлу Синаевамен, «Мәді Қажы» ЖШС-нің төрағасы Сейіткамал Сұлтановпен, еңбек ардагерлері Қанатбек Әбілқасыммен жүздесті. Кездесуде аудан әкімі жастайынан жұмысқа араласып, ел дамуына елеулі еңбегімен үлес қосқан еңбек адамдарының өмір жолы жас ұрпаққа үлгі-өнеге екенін атап, сый-құрмет көрсетті. Өз кезегінде екі бірдей «Еңбек даңқы» орденінің иегері Бексұлу Синаева құрмет көрсеткен аудан басшысына ризашылығын білдірді.
Ұлттық жобалар тізбесінің бірегейі кә­сіп­керлікті дамытуға арналған. Бұл орайда, аудан басшысы Н.Ілиясов ауылындағы жеке кәсіпкер Роллан Олиновтың бал арасын кеңейту жұмысымен танысты.
Жеке кәсіпкер осыдан екі жыл бұрын кәсіпкерлікке бет бұрған. «Микробизнес Қызылорда» өңірлік инвестициялық ор­талығы арқылы 1 млн теңге несие алып, бал ара өсіру кәсібін бастаған. Ал өткен жылы «Бизнестің жол картасы – 2020» бағ­дарламасының грант тетігі бойынша омарта шаруашылығын дамытуға 2 млн теңге ұтып алған. Соның нәтижесінде, кәсібін кеңейтіп, бүгінде бал өнімдерін ауыл, аудан және қала тұрғындарына арнайы сауда нүктелері арқылы өткізуде.
Жұмыс сапарында аудан әкімі Мұрат Ергешбаев «Кең дала» шаруа қожалығына да арнайы барды. Шаруашылық төрағасы Расул Есенов атқарылып жатқан жұмыстарды айтты.
– Шаруа қожалық жұмыстарын жандандыру қолға алынып, кәсібімізді дөңгелетіп жатырмыз. Бүгінде қожалық жерінен ба­лық шаруашылығын дамыту үшін тоған ашу жұмыстарын жүргізудеміз. Сондай-ақ, бұл жерде 200 бас жылқы бордақылау алаңы аштық. Сол арқылы халықты етпен қамтуды жүзеге асырамыз. Одан бөлек, алма бағын ашуды да көздеп отырмыз. Қазіргі таңда оның жерін дайындап жатырмыз. Осы жұмыстардың барлығы ел үшін жасалып, тұрғындарды жұмыспен қам­тудамыз, – деді Расул Әбутәліпұлы.
Аудан басшысы кәсіпкердің атқарып жатқан жұмысына ризашылығын білдіріп, кәсіпкерлік дамыса, игілік еселенетін тілге тиек етті.
Жалпы, пандемия шектеулеріне қара­мастан Қызылорда өңірінде кәсіп ашуға ниетті азаматтардың қатары көбейіп, ай­мақ республика бойынша үздік үш­тік­ке енген. Сондай-ақ, облыстағы эконо­микалық белсенді халықтың үштен бірі кәсіпкерлік бағытта жұмыспен қамтылған. Яғни, өсім 9,1 пайызды құрап, аймақтар арасында ІІ орынға көтерілді. Мұны облыс­тық кәсіпкерлік және туризм басқар­масының басшысы Ф.Қожабергенов мәлім­деген бо­латын. Демек, аймақта кәсіп­керлік сала­сының қарқынды дамуына сырдария­лық­тардың қосып жатқан үлесі зор.

Е.БЕРКІНБАЕВ
23 қазан 2021 ж. 151 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам