Халық алғысын алған фельдшер

Биылғы жыл әлем жұртшылығы үшін денсаулық сақтау саласы мамандарының өміріміздегі алатын орнын көрсетіп бергендей. Пандемия кезінде өз жанынан өзгенің денсаулығын артық қойып, күн-түн демей тікесінен тік тұрып қызмет атқарған медицина қызметкерінің бірі – Анфиса Семенова.

Анфиса Петровна Тереңөзек кен­тінде дү­ние­ге келіп, ауданымыздағы №36 Ә.Тәжібаев атындағы мектепті тәмамдаған. 2001 жылы Қызылорда медициналық кол­леджін қызыл дип­ломға бітірген. Қазіргі таңда Сырдария аудандық жедел-жәрдем қызметінде фельдшер болып қызмет атқарады. Бала күнінен әжесінің тәр­бие­сінде өскен Анфиса, ол кісінің көп ауыр­ғандығын көріп өскеннен соң дәрігер болып, адамдарға көмек беремін деп армандаған екен.

Қазіргі таңда 19 жылдық тәжірибесі бар маман артериалдық гипертензия, инфаркт, инсульт алған ауыр жағдайдағы науқастарға бірнеше мәр­те алғашқы медициналық көмек көр­сеткен. Жұмыс тәжірибиесінде осыдан бес жыл бұрын үй жағдайында жүкті әйелді аман-есен босандырып  алған  Анфиса Петровна өз сөзінде:

– Мен әрбір емделуші үшін қатты алаңдаймын, науқастың жағдайы жақ­сарып кеткенше дәрігерден халін біліп отырамын. Ауыр жағдайдағы науқастар оңалып келе жатқанын естісем жүре­гімде тыныштық орнап, ерекше қуа­нам, – деді.

Осы сөздердің өзі Анфисаның өз ісін ерекше ықыласпен жасай­тындығын көрсетіп тұрғандай. Ма­ман ретінде елдегі қиын жағдай ке­зінде аянбай қызмет етіп, адам жанын арашалап қалуға көмек бере отырып, өз мамандығына деген махаббатын тағы бір дәлелдей түскендей. Елде вирусты инфекция тарап жатқан шақта араға күн салып кезекшілік атқарып, 30-40 шақырту қабылдап, тәулік ішінде бірнеше адамның жанын ажалдан арашалап қалуға тырысқан Анфиса Пет­ровна бұл жағдайдың өзі үшін де оңай болмағандығын айтты.

–  Үй шаруасымен қатар халықтың мұң-мұқтажын арқалап жүру оңай бол­­мады. Өзім де вирустың жең­іл түрімен ауырдым. Дегенмен, тұр­ғын­дардың өмірі маңызды екенін біл­гендіктен өзім­­ді тез жинап алдым. Тәулік бойы ті­ке­­мізден тік тұ­рып, жаз­­дың ыстығына қарамастан ауа өткізбейтін сырт киім­дер киіп, әрбір науқастың өмірі үшін күрестік. Жұ­мысқа жағдайдың жақсаруынан үміт­теніп ке­ле­тінмін. Мен үшін ең ауыры әріптесім Жанар Қостаевадан айрылып қалағандығымыз болды. Алайда соңына дейін үміт үзбей, мықты болу керек екендігін түсініп, жақсылықтың боларына сендім, – дейді Анфиса Пет­ровна.

Анфиса ауданымыздың денсаулық сақтау саласына айтарлықтай үлес қосып келе жатқан маман, сонымен қатар жары Петрмен екі бала тәрбиелеп отырған ардақты ана. Тұң­ғышы Анас­тасия тоғызыншы сынып оқыса, кішісі Даниил алтыншы сыныпта оқиды. Осындай өз ісінің маманы Анфиса Петровнаға аудан тұрғындарының да айтар алғысы бар екен.

– Былтыр менің қан қысымым 200-ге көтеріліп, жедел-жәрдем қызметін шақырған болатынмын. Сонда Анфиса Семенова маған алғашқы медициналық көмек көрсетіп, нәзікжанды болғанына қарамастан зембілдің бір жағын өзі ұстады. Өз ісінің маманы болуымен қатар, мамандығын сүйіп жасайтын мықты медицина қызметкері деп сеніммен айта аламын және шын жүректен алғысымды білдіремін, – дейді Жанар Тұрсынбайқызы.

Науқасқа алғашқы көмектің дұрыс көрсетілуі өмірін қауіптен аман алып қалуға ықпал етері анық. Анфиса секілді халық алғысын алып, жанына араша түсіп, дертіне шипа тауып жүрген осындай қызметкердің ауданымызда болғаны біз үшін қуаныш.

Жұлдызай АНШАЕВА