«Біртұтас тәрбие» бағдарламасы негізінде театрдың нағыз тәлім-тәрбие мен тағылымның ортасы екендігін насихаттау мақсатында Сәкен Сейфуллин ауылдық клубында №137 орта мектептің ұйымдастыруымен «Театр – мәдениет пен тәрбиенің ошағы» атты аудандық фестиваль өтті. Тағылымы мол ерекше фестивальға аудандық білім бөлімінің әдіскері Салтанат Сақтағанова, білім ошақтарының тәрбие ісі жөніндегі орынбасарлары, ұстаздар қауымы мен «Мектеп театры» жобасы аясындағы театр жетекшілері қатысты.Мектеп ұжымы тағылымы мол фестивальға өте жоғары деңгейде тыңғылықты дайындалған. Әр шақы­рыл­ған қонақты жылы лебізбен қар­сы алып, өз қонақжайлықтарын көрсет­ті.Фестиваль ең алдымен «Селт еткізер» тренингімен басталды. Тренинг ұлт­тық құндылығымызды дәріп­теген салт-дәстүр­­ден көрініс тапқан өнерпаз­дар­­дың күмбірлі күйімен бас­­талып, одан әрі әдемі сахналық кос­тюм киген бүлдіршіндердің көрінісі­мен, батырлардың тәрбиелік мәні зор ұлағатты сөздерімен, әжелер ансамблінің әсем әнімен және шашумен жалғасып, ұлттық құндылығымыздың негізгі көрінісін айшықтай түсті. Содан соң талантты өнерпаздарымыздың дайын­даған театрлық қойылымдары көрсетіл­ді.

Фестиваль барысында «Мек­теп театры» жобасының мүшелері «Атасы мен немересі» тақырыбында пролог, А.Шамшадиннің «Кешір ана» атты жанұялық тәрбие­лік қойылымы, М.Мақатаевтың өмірі туралы «Бұл ғасырдан емеспін» фильмінің желісінде жазылған «Мұз­ба­лақ» қойылы­мы мен «Бақыт деген» мюзиклы, С.Жүнісовтің «Аманай мен Заманай» повесінің желісінде үзін­ді қойылымы көп­шіліктің көңілінен шы­ғып, ерекше әсер қалдырды. Тіпті кей­бір әсерлі тұстарында көзге еріксіз жас келді. Талантты өнерпаздар ауыр жанрдағы қойылымдарды асқан шеберлік­пен сомдап, көрерменнің ыстық ықыласына бөленді.Өз кезегін­де ардагер ұстаздар өнерпаздарға шығар­машылық табыс пен таусылмас шабыт тілеп, өз алғыстарын айтты.Іс-шара соңында осы фестивальға өз үлестерін қосып, өз дәрежесінде өтуіне атсалысқан жетекшілерге аудандық білім бөлімінің басшысының «Алғыс хаты» табысталды. Фестиваль өз мәресіне жетіп, қорытындылау сөзі мектеп директоры Бағдат Есназарға беріл­ді.
– Бұл фестивальді ұйымдастыру­дағы мақсатымыз – «Мектеп театры» жобасы аясында балалардың ішкі жан дүниесінің ең жақсы жақтарын аша білу. Өнерге тәрбиелеу арқылы оқушылардың дарындылық қасиеттері мен шығармашылық қабілетін ашып, одан әрі шыңдау. Театр – рухани тәрбие орталығы, тәрбиенің көзі. Сондықтан өскелең ұрпақтың арасында өнердің осы бір түрін дамыту аса маңызды. Талантты балалардың басын біріктіретін үйірменің берері мол. «Мектеп театры» жобасының мүше­лері де сахнада өздерін еркін ұстауға, кейіпкер бейнесін ашуға, шығар­маның мазмұнын толық түсініп, сахналап шығуға машықтанып келеді. Бұның барлығы – ұстаздар мен жетекшілердің еңбегінің арқасы. Бес минуттық көрініс дайындаудың өзіне шамамен 5 күндей уақыт кетеді. Сондықтан ұстаздар қауымы әрқашан құрмет пен марапатқа лайықты. Бүгінгі іс-шарамызға алтын уақыттарыңызды бөліп келгендіріңізге алғысымды білдіре отыра, шығармашылық табыс тілеймін, – деді мектеп директоры.