Ерекше форматта өткен алқа оты­ры­сына аудандық ардагерлер кеңесінің төрағасы Мұса Келдібаев, аудандық Қоғамдық кеңес төрағасы Марат Еспенбетов, халықаралық «Қазақ тілі» қоғамдық бірлестігінің ау­дан­дық филиал төрағасы Шаһарбек Нұрсейіт, «Сырдария-Нұрдария» қо­ғам­­дық қорының төрағасы Марат Омаров, алқа мүшелері қатысты.

Жиын басталмас бұрын жиналған көпшілік қауым кенттің Қ.Бөдеев пен Т.Қозыбаев көшесінің 14 тұрғыны, әже­­лер дайындаған көрмемен таныс­ты. Тату-тәтті тірлігімен, ұйымшыл­дығымен дараланған көршілер көрме­ге берекелі күздің молшылығын әкел­ген, араларында қолөнер ше­бер­­лері өз бұйымдарымен таныс­тырды. Содан соң жиынды ашып алғы сөз алған «Әжелер алқасының» жетекшісі Ұлмекен Жанәлиева қайта жасақталған алқа мүшелерінің атқар­ған жұмысы туралы айтып өтті.

«Әжелер алқасының» негізгі мін­детіне тоқталып, ұлттық тәрбиені ұлықтау мақсатында құрылған ал­қа мүше­лері жоспарға сәйкес түрлі іс-шараларға қатысып, бүгінгі таң­да жұмысы жанданған. Жыл басын­да құрылған кезден бастап аудан­дық форум өткізіп, облыстық «Ая­лы әже» байқауына қатысқан шіркейлі­лік Гүлжауһар Оразәліқызы мен қоғалы­көлдік Рахима Алдашқызы жақсы өнер көрсетіп, жүлделі орын алған.

–Негізінен ауданда «Әжелер мекте­бі­нің» жұмысы бұрыннан жақ­сы жолға қойылғанын білесіздер. Мек­тептің ең жасы үлкен мүшесі Сәния Төремұратованың жасы 85-те болса, ең жас мүшесі – Ләззат Палымбетова 65 жасқа толды. Осы уақытқа дейін әжелердің атқарған жұмысы ұшан-теңіз. Жаңаша форматта құрылған «Әжелер алқасының» жұмысын жүргі­зу бізге қиынға соқпады. Бұрыннан ізі бар, жұмысы жолға қойылған мектеп­тің ақ жаулықты әжелерінің барлығы өнерлі, қандайда болсын көпшілік мәдени іс-шараның өтуінде алдыңғы қатарда жүреді. Әдемі дәс­түрмен шашу шашып, ән айтып, қол­өнершілер көрме ұйымдастырады. Міне, бүгін ортамызда отырған Гүлжауһар Оразәліқызы мен Рахима Алдашқызы аудан әжелерінің намысын қорғап, облыстық байқауда топ жарды. Олардың өнерлері жоғары бағаланды. Бүгінгі отырысымызда осы өнерлі әжелерге құрмет көрсетіп, биылғы жылы мерейтойларын атап өткен «Әжелер мектебінің» екі бірдей мүшесіне сый-сияпатымызды жасаймыз, – деді Ұлмекен Жанәлиева.

Иә, қазақ қоғамында әженің орны бөлек. Немересіне тәрбие беру­дегі ерекшелігі, әсіресе қыз бала тәрбиесін алдыңғы орынға қоятын әжелер ұлағат жолынан айныған емес. Бір ғана мысал, Абайдай дана тәрбиелеген Зередей зерделі әже­лердің ұрпақ тәрбиесінде рөлі өте жоғары. Сондықтан әжелердің өнегелі өмірін үлгі ете отырып, балаларды өмірге үйрету, мектептегі қыз балаларды қазақтың ұлттық салт-дәстүріне баулуда әженің орны ерек.

Осы ретте аудандық ардагерлер кеңесінің төрағасы Мұса Келдібаев, аудандық Қоғамдық кеңес төрағасы Марат Еспенбетов, «Сырдария-Нұрдария» қоғамдық қорының төра­ғасы Марат Омаров сөз алды. Ардақ­ты ардагерлер туған жерін, елін, шаңы­рағын ардақтайтын тәрбиелі қыз, төзімді ана, қайратты жан болуға, әсіресе, бұрымды қыздарымызды үлкен­ге құрмет, кішіге ізет көрсете білуге тәрбиелеудегі әжелердің рөлі­не тоқталды. Ауданда құрылған «Әже­лер алқасының» мүшелері үлгілі өнерімен өнеге көрсете отырып, ата дәстүрді сақтау секілді асыл қасиетті дәріптеуде қажыр-қайратын аямай отыр­ған әжелерге алғыс білдірді.

Алқалы жиында биылғы жылы мерейлі 75 жасқа келген ардагер-ұстаздар Гүлбар Әбілова мен 65 жасқа келген Ләззат Палымбетоваға құрмет көрсетіліп, «Әжелер алқасы» мүшелері мерейтойларымен құттықтады. Қос арда­гердің өнегелі өмір жолдары айтылып, сый-сияпат жасалды.

Қазақ – басынан қандай қиын заман өтсе де ұрпағына ұлағатты тәрбие бере алған халық. Ұлтжанды ұл, қылықты қыз тәрбиелеген. Әсіресе, көпті көрген қарт әженің тәрбиесі қазақ қоғамында үлкен рөл атқарған. «Ел болам десең, бесігіңді түзе» дейді аса көрнекті жазушы Мұхтар Әуезов. Ал бұл сөздің өз мәнінде жүзеге асуы­ның түп негізін әжелер өнегесінен алып қарауымыз да заңдылық. Бұл ұлағат­ты сөз кез келген адамды, ең алдымен, өз елінің салт-дәстүріне деген жанашырлыққа, ұлттың ұлы мұратына деген адалдыққа, Отанға деген шынайы тазалыққа үйретері хақ. Осыдан-ақ, әжелер мектебі – бұл ұғымды бойға тереңнен сіңіретін бірден-бір жол десек, еш қателеспеспіз.

Осы күні дөңгелек үстел басына жиналған ақ жаулықты әжелер емен-жарқын әңгімелесіп, жақсы тілектерін ортаға салды. Өнерлі әжелер әннен шашу шашты. Кездесу соңында бар­лық қатысушы бір-біріне алғыс айтып, отбасының берекесі саналатын әжелер – қоғамның берік іргетасы екендігін тағы бір мәрте атап өтті.