Қазақстан Республикасы Парламенті Сенаты төрағасының орынбасары Бектас Бекназаров, сенаторлар Мұрат Бақтиярұлы мен Бекмырза Еламанов жұмыс сапарымен Сырдария ауданына келіп, аудандық мәдениет үйінде аудан активімен кездесті. Кездесуді аудан әкімі Ғанибек Қазантаев ашып, жүргізіп отырды. Жиынға облыстық мәслихат хатшысы Наурызбай Байқадамов, аудандық мәслихат хатшысы Ержан Әжікенов, аудан әкімінің орынбасарлары Бақытжан Лекеров, Балшекер Өтегенова, Ерлан Ахетов, мекеме басшылары, ауданның зиялы қауым өкілдері, үкіметтік емес ұйым мүшелері, ардагерлер, жастар және БАҚ өкілдері қатысты. Кездесуде ҚР Парламенті Сенатының төрағасының орынбасары Б.Бекназаров Парламентте қабылдаған заңдардың мазмұны туралы баяндама жасап, рухани жаңғыру, ұлттық құндылықтарды сақтау мен қазақ тілін латын қарпіне көшіру мәселелері кеңінен талқыланды. Сенаторлар кездесуге қатысушылардың сауалдарына жауап берді. Аудандық ардагерлер кеңесінің төрағасы Х.Әбенұлы атқарылған жұмыстар ауқымды екенін айтып, депутаттардың жұмысына сәттілік тіледі. Соғыс және еңбек ардагері Я.Тасыров халық қалаулыларына ақ батасын берді.