Бүгінде басылым қырық мыңға жуық аудан халқы мен алыс-жақын қала, облыстағы тұ­рақты оқырмандарына қыз­­мет етіп отыр. Жыл бойын­дағы атаулы даталарға бай­­ланысты уақытша айдарлармен бірге тұрақты айдарлар аясында тұшымды ма­қалалар жазып, көрермен көзайымына айналған газет маман­дары оқырман үдесінен шығу жолында аянбай еңбек етуде. Сондай-ақ ресми сайт пен әлеуметтік желідегі пар­ақшалар заман талабына сай тәулік бойына оқырманға ақ­парат таратып, жүйелі жұмыс­ты үйлестіріп келеді.

Газеттің өзі бір күндік бол­ғанымен, сөзі мың күндік. Бетте қатталып, жылнамалар жазылған иісі ерекше парақ­тар тарих қойнауына енеді. Ақпарат алмасудың заманауи тәсілдері көп бол­ғанымен, газет бетіндегі шынайы ақпа­рат, байыпты сөз, нақты тұжы­рымды алмас­тыра алмайтыны анық.

Әдетте біз газетке жазылу науқанында алғашқы болып межені толық орындаған мекемелерді газетке шығарып, ақпараттық қолдау көрсетеміз. Сондай-ақ аудандық газетті жыл сайын тұрақты түрде қолдап, демеушілікпен еңбек ардагерлерінің мекенжайына тегін газет жазып беретін жо­март жүректі жандар бар. Біз олардың еңбегін жоғары бағалап, төл басылым арқылы тілектестігімізді білдіреміз.

Осы жылы аудандық мәс­лихат, Отбасын қолдау орта­лығы, Су шаруашылығы, Ор­ман және жануарлар дүние­сін қорғау мекемелері, «Жалын» лагері, Айдарлы, Аманкелді ауылдық клуб үй­лері, кент мәдениет үйі, кент клубы және «Шаттық», «Ақкөгершін», «Қызғалдақ», «Алтын сақа», «Балдырған», «Айгөлек» балабақшасының қыз­меткерлері алғаш­қы­лар­дың бірі болып аудандық га­зетке толық жазылып, ме­жені жүз пайызға орындап отыр. Сондай-ақ Ақжарма ауы­лындағы берекесі тасыған «Ақжарма және К», «Ақжарма 2», Н.Ілиясов ауылындағы ір­гелі «Мағжан және К» ЖШС жер­­гілікті басылымға қолдау көрсетуде. Бұл ретте, білім беру, денсаулық сақтау салалары мен жергілікті бөлім мен мекемелер ақпарат тарату қарқын алып тұрған кезеңде мерзімді басылымдардың рөлі зор екенін жақсы түсінеді. Жалпы аудан тұрғындары – аудандық газеттің тұрақты оқыр­мандары. Өз кезегінде зейнеткерлеріміз жеке-дара келіп, газетке арнайы жазылып, ақ батасын беріп жатады. Ауданның абыройын ту етіп, күндіз-түні газеттің сапалы шығып, уақытылы ха­­лыққа тарауына өзіндік үле­сін қосып жүрген редакция қыз­меткерлері үшін бұл – зор абырой, мәртебе. Бұл ретте басылым жанашырларына, тұрақ­ты оқырмандарына шек­сіз алғысымызды біл­діреміз!

Қоғам қайраткері, ға­сырдан аса тарихы бар ұлт басы­лымы «Қазақ» газетінің екінші тынысын ашқан жазушы Қоғабай Сәрсекеев «Қазақ» газетінің бас редак­торы болып тұрғанда газет шыққан күні Алматы кө­шелеріндегі дүң­гіршекке ар­­на­йы барып, кеше өзі бас­паханаға жіберген газетті са­тып алып оқиды екен. Бұл – газетке ғана емес, ұлтқа, тілге, руханиятқа жасалған құрмет, қамқорлық. Бұл ретте, ойлы оқырманымызды жаңа­лық жаршысы, тіршілік ты­ны­сына айналған газетімізді қол­дауға шақырамыз!