Ең алдымен аудан әкімінің орынбасары Димаш Серікбайұлы сала мамандарын кәсіби мерекемен құттықтап, құқық қорғау қызметкерлерінің қоғамдағы маңызы жоғары екеніне тоқталды.

– Прокуратура – қоғамдағы заңдылық пен тәртіпті нығайту жолындағы мемлекеттің негізгі құқықтық тірегі. Прокуратура қызметкерлерінің кәсібилігі – қоғамның құқықтық жүйеге деген сенімі мен әділеттілікті сақтаудың кепілі. Қоғамдағы заңдылық пен тәртіпті, азаматтардың конституциялық құқықтары мен бостандықтарын қорғау және тұтас мемлекеттің құқықтық саясатын жүзеге асыру жолындағы еңбектеріңіз өлшеусіз. Баршаңызды бүгінгі прокуратура саласы қызметкерлерінің кәсіби мерекесімен шын жүректен құттықтаймын. Заңдылықты нығайту жолындағы еңбектеріңіз еселене берсін, – деді аудан әкімінің орынбасары.

Одан кейін сөз кезегі аудандық ардагерлер кеңесінің төрағасына берілді. Мұса Алпысбайұлы қазақ еліндегі заң жарғылары мен мемлекеттік құрылымның сонау замандардан бастау алатынын тілге тиек ете отырып, тарихи деректерге тоқталды. Сондай-ақ «Тәртіпке бағынғанның құл болмайтынын» айтып, сала мамандарының жауапты жұмысына сәттілік пен абырой тіледі. Жиында облыстық мәслихат депутаты Ж.Ембергенов, аудандық полиция бөлімі бастығының міндетін атқарушы Қ.Асанұлы, «AMANAT» партиясы аудандық филиалының Атқарушы хатшысы А.Ибрагимұлы сөз сөйлеп, кәсіби мереке иелерін құттықтады.

Мұнан соң сала қызметкерлеріне аудан әкімінің алғыс хаты табысталып, сый-құрмет көрсетілді. Аудан прокуроры Асқар Жәметұлы кәсіби мерекеде құрмет көрсеткен аудан әкімдігіне ризашылығын білдіріп, әріптестерін мерекемен құттықтады.