Жеңімпаздарды айқындау жөніндегі комис­сияның негізгі мақсаты – аудандық деңгейдегі қатысушылардан екі отбасын облыстық кезеңге анықтау. Осыған орай аудан әкімінің орынбасары Д.Байдушевтің төрағалығымен комиссия отырысы өткізілді.

– Байқаудың басты мақсаты – ұлттық құн­дылықтарды жаңғыртып, отбасы мен некенің жағымды үлгісін көрсету, отбасы мәртебесін арттыру, мерейлі отбасыларды үлгі-өнеге ету арқылы – өскелең ұрпақты ізгілікке тәрбиелеу. Ел ішінде құрметке бөленген ардақты да берекелі әулеттер, өнегесі мол отбасылар аз емес. Қазыналы қариясын қадірлеп, ата-анасын ардақтаған, балалары бақытқа бөленіп, жарасымды жанұя атанып отырған отбасылар – бүкіл қоғамның айнасы. «Мерейлі отбасы – 2024» ұлттық конкурсының аудандық дең­гейде ауылдық округтерден барлығы 11 отбасынан өтінім келіп түсті. Тереңөзек кентінен, Ақжарма, Шаған, А.Тоқмағамбетов, Қалжан ахун ауылдарынан конкурсқа қатысушы отбасы мүлдем ұсынылмаған. Алдағы уақытта жұмыс­тың сапалық мазмұнын арттыру бағытында ұйымдастыру жұмыстарын дұрыс үйлестірмеген тиісті басшылардың жауапкершілігі қаралатын болады, – деді Димаш Серікбайұлы.

Комиссия мүшесі, аудандық әйелдер кеңесі­нің төрайымы Ұ.Жанәлиева берекелі, бақытты отбасы қуатты мемлекеттің тірегі екенін айта келе, ұлттық конкурстың маңыздылығына тоқталды.

– Бала тәрбиесінде және оның дара тұлға болып қалыптасуында ата-ананың рөлі мен отбасы құндылығының маңызы өте зор. Мемлекет басшысы Қасым-Жомарт Кемелұлы Тоқаев Ұлттық құрылтайдың екінші отырысында «Елі­міздің болашағы отбасында қалыптасады. Ал отбасы бақытты болса, еліміздің келешегі де жарқын болады. Мемлекеттің ең басты байлығы – адам, яғни азаматтар. Әрбір ата-ана саналы ұрпақ өсіруге баса мән беруге тиіс» дей келе отбасының рөліне айрықша тоқталғаны белгілі. Сондықтан ұлттық конкурстың маңызы жоғары, – деді Ұлмекен Шанайқызы.

Мұнан соң комиссия мүшелері өз ой-пікір­лерін ортаға салып, ашық дауыс берумен облыстық кезеңге С.Сейфуллин ауылының атынан қатысқан Есекеевтер отбасы мен Шіркейлі ауылының атынан қатысқан Шербатшаевтар отбасы жолдама алды. Қалған отбасылар үшін ауданда арнайы іс-шара ұйымдастырылып, олар­ға түрлі номинациялар берілетін болып келісілді.