Тіршілік тынысы Сырдария аудандық қоғамдық-саяси газет
» » » Облыстық кезеңге жолдама алды

Облыстық кезеңге жолдама алды

Елімізде «Мерейлі отбасы» ұлттық бай­қауы жыл сайын ұйымдастырылып келеді. Аталған байқаудың әуелі аудандық, кейін облыстық кезеңі өтіп, әр өңірден жеңімпаз атанған отбасылар республикалық деңгей­де марапатталады. Биыл ауданымызда ұлт­тық байқауға қатысуға ниет білдірген отбасылар жылдағыдан көп болды.

Аудан әкімінің орынбасары Димаш Байдушевтің төрағалығы­мен кезекті комиссия отырысы өтіп, онда ұлттық байқаудың облыстық кезеңіне жолдама алған отбасылар анықталды. Комиссия қарауына 18 жұмыс келіп түсті. Әр отбасының дерегімен танысып, жетістігі мен өнегелі істерін бағалаған комиссия мүшелері өз ұсыныстарын ортаға салып, ортақ тақырыпта пікірлесті. Аудан әкімінің орынбасары ұлттық байқаудың идеологиялық мәні мен мазмұны ерекше екенін айтып, көпбалалы және адал еңбекті ту еткен отбасыларға ерекше басымдық беру қажеттігін атап өтті.

– Байқаудың аты айтып тұрғандай, бұл жерде отбасының мерей-мәртебесі бағалануы қажет. Ал кез келген отбасының мерейі, мәртебесі, даңқы маңдай термен, ізденіспен келген адал еңбекпен ұштасады деп ойлаймын. Сондықтан еңбекқор отбасыларға мән бергеніміз дұрыс. Сондай-ақ ұлды ұяға, қызды қияға қондырған көпбалалы отбасылар да назардан тыс қалмауы қажет. Комиссия сондай-ақ ұсынылған құжаттардың сапасына, қатесіз жазылуын да ерекше назарда ұстауы тиіс, – деді аудан әкімінің орынбасары.

Комиссия мүшелері Ұлмекен Жаналиева, Жеңісбек Төрәлиев, Мағрипа Жүсіпбеко­ва, Жанар Жұма­баева байқауға ұсынылған құжаттардың сапасы жыл сайын артып келе жатқанына тоқталса, Ғалия Жаңабаева, Мақсұт Қаратаев, Бейбіт Смай­лов, Ерлан Әбілдаев ұлттық байқаудың облыс­тық кезеңіне жолдама алуға мүм­кіндігі бар бірқатар отбасыларды айтты.

Талқылаудан соң ашық дауысқа салынып, шіркейлілік Есенхожаевтар мен шағандық Сарыбаевтар отбасы облыстық кезеңге жолдама алса, қалған отбасылар аудандық кезең қорытындысы бойынша марапатталатын болды. Марапаттау іс-шарасы мен ұлттық байқаудың облыстық кезеңінің өтетін уақыты қатысушы отбасыларға қосымша хабарланады.




А.СЕЙІЛОВ
21 маусым 2022 ж. 49 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам