Нақты тапсырма берілді
Аудан әкімінің міндетін атқарушы Берік Сәрменбаевтың төрағалығымен аудан әкімдігі жанындағы терроризмге қарсы күрес жүргізу бойынша аудандық комиссияның отырысы өтті. Комиссияның күн тәртібінде негізгі үш мәселе қаралып, тиісті сала басшыларының хабарламалары тыңдалды.Алдымен, аудандық қоғамдық даму бөлімінің басшысы Бейбіт Смайлов ақпараттық түсіндірмелік топтың атқарған жұмыстарының есебін берді. Бөлім басшысы әлеуметтік желілерде деструктивті діни идеологияларға қарсы насихатты ұйымдастыру жұмыстарының нәтижелеріне тоқталды. Сонымен қатар ақпараттық түсіндірмелік тобы мүшелерінің белсенділігі және осы мақсаттағы жұмыстарға блогерлерді тарту бойынша өз ұсыныстарын ортаға салды.
Мұнан соң жастар арасында діни экстремизмнің алдын алу, жастарды қоғамға бейімдеу, жастар арасында жұмыссыздық деңгейін төмендету мақсатында жүргізілген іс-шаралар туралы аудандық жұмыспен қамту, әлеуметтік бағдарламалар және азаматтардың хал актілерін тіркеу бөлімінің басшысы Мақсұт Қаратаев пен аудандық жастар ресурстық орталығы мамандарының есебі тыңдалды.
Комиссияда аудан аумағындағы террористік тұрғыдан осал объектілерге жүргізілген тексерулердің қорытындысы да талқыланды. Бұл бойынша аудандық полиция бөлімінің бастығы Ғани Тұрсекеев хабарлама жасап, нысандардың терроризмге қарсы қорғалуын жетілдіру бағытында назар аударуы тиіс жұмыстарды айтып өтті. Комиссия отырысының қорытындысы бойынша жауапты мекеме басшыларына тиісті тапсырмалар беріліп, оның орындалуы бақылауға алынды.
«ТТ» ақпарат
