САРБАЗДАРҒА СӘТТІЛІК ТІЛЕДІ

«Болашаққа бағдар: рухани жаңғыру» мақаласынан туындаған міндеттерді орындау мақсатында бүгін Тереңөзек кентінде өткізілген «Қарттар – тарих, ел қазынасы» мерекелік іс-шарасында сырдариялық бірқатар жас сарбаздарды әскерге шығарып салу рәсімі ұйымдастырылды. Жас ұрпаққа патриоттық бағытта серпін беретін іс-шарада аудан әкімінің міндетін атқарушы Б.Өтегенова сөз сөйлеп, міндетті әскери қызметті өтеуге аттанып бара жатқан жас сарбаздарға сәттілік тіледі.
– Халқымызда «Отан мен отбасы егіз ұғым» деген даналық сөз бар. Отанды қорғау міндеті елдің ержүрек азаматтарына жүктелетіні белгілі. Елжанды, патриот азаматтар ғана елге қалтқысыз қызмет етеді. Әскери қызметте абырой тұғырынан көрініп, ата-аналарыңыздың үмітін, ұстаздарыңыздың сенімін ақтауға тілектестігімді білдіремін,- деген Балшекер Сұлтанбекқызы жас сарбаздарға аудан әкімі атынан Құттықтау хат табыс етті.
Іс-шара барысында сөз алған аудандық ардагерлер кеңесінің төрағасы Х.Әбенұлы егемен елдің тыныштығы жолында әскерге аттанған сарбаздар жастар үшін үлгі-өнеге екенін атап өтті. «Болашаққа бағдар: рухани жаңғыру» бағдарламалық мақаласына орай өткен салтанатты шарада патриоттық әндер айтылып, аудан өнерпаздары өз өнерлерін көрсетті.
Сырдария ауданы әкімінің баспасөз қызметі