Білім саласы қызметкерлері алғысқа бөленді

№35 Иса Тоқтыбаев атын­дағы мектеп-лицейде «1 нау­рыз – Ал­ғыс ай­ту кү­ні» мере­кесінде білім саласы қыз­меткерлерімен кездесу өтті. Оған аудандық білім бөлімінің басшысы Қали­хан Омаров, білім саласы қыз­мет­керлерінің кәсіподақ коми­тетінің төрағасы Алмас Есназар, өнер мектебінің директоры Марат Сәдуақас, білім ошақ­тарының кіші буын қызмет­керлері қатысты.

Іс-шара барысында аудандық білім бөлімінің басшысы Қалихан Омаров жиналған көпшілікті мерекемен құттықтады.

– Сіздерді Алғыс айту күні мерекесімен шын жүректен құттықтаймын! Атаулы мереке – өзара құрмет пен сенімнің, мейірім мен ізгіліктің мерекесі. Бұл күні барша адамдар бір-бірімен сыйластық танытып, ризашылығын білдіреді. Ел болашағы – жас ұрпақты оқытып, тәрбиелейтін білім ошағында қызмет етіп, мектептің материалдық-техникалық базасының нығайюы жолында, санитарлық талаптардың сақталуына жауапкершілікпен қарап келе жатқан Сіздерге мың алғыс, – деді бөлім басшысы.

Өз кезегінде білім ошақтарының кіші буын қызметкерлеріне арнайы «Алғыс хат» пен бағалы сыйлық табысталды. Аудандық білім саласы қызметкерлерінің кәсіподақ комитетінің төрағасы Алмас Есназар мерекенің мән-маңызына тоқталды.

– Көктемнің алғашқы күнінде ерекше мерекеде жиналып отырмыз. Білім саласында Сіздер атқаратын жұмыстың жүгі ауыр. Біздер қай кезде де өз қызметкерлерімізді ынталандырып отырамыз. Мұндай іс-шара аудан бойынша барлық мектепте ұйымдастырылуда. Шалғайда орналасқан ұлағат ұяларында әріптестеріміз марапат төрінен көрінуде, – деді кәсіподақ комитетінің төрағасы.

Мерекелік кездесуде аудандық өнер мектебіне қарасты Қоғалыкөл ауылдық филиалының мұ­ға­лімдері Бағдат Ыдырысов пен Қайрат Сәтбаев жи­налғандарға әннен шашу шашты.

Айта кету керек, марапат төрінен көрінген әріп­тестері атынан №126 орта мектеп қызметкері Айтан Мұстафаев ұйымдастырушыларға шынайы ал­ғысын білдірді.

Балтабай ОРДАБЕКОВ