Тіршілік тынысы Tirshilik-tynysy.kz ақпараттық агенттігі
» » Сала ардагерлеріне – сый-құрмет

Сала ардагерлеріне – сый-құрмет

Ауданның білім саласы қарттар мерекесімен қатар келген мұғалімдер күнін лайықты атап өтті. Аудандық білім бөлімінде сала басшысы Қ.Омаров білім беру жүйесін дамытуға, тәуелсіз еліміздің жас жеткіншектерін оқыту мен тәрбиелеуге орасан зор үлес қосқан барша ардагер-ұстаздарды құттықтап, мерекелік қабылдау жасады.
Мерекелік қабылдауға келген ардагер-ұстаздарды құттықтаған білім бөлімінің басшысы Қалихан Омаров:
– Құрметті ардагер-ұстаздар! Сіз­дер еліміздің болашағы мен кемел келешегі үшін талмай қызмет етіп, саналы ғұмырларыңызды бала тәрбиесіне, ауданымыздың білім саласының да­муына арнадыңыздар. Қазіргі таңда сіз­дер тәуелсіз еліміздің өркениетті отыз елдің қатарына қосылуы жолында қоғамдық жұмыстарға араласып, игілікті іс атқарып келесіздер. Ел болашағы – жастарды ізгілік пен мейірбандылыққа, Отанға адал қызмет етуге, тәуелсіз еліміздің жарқын болашағына сеніммен қарауға, жақсы күндерді еселі еңбекпен жақындатуға үйреттіңіздер. Осындай зор еңбектеріңізді бағалай отырып, айтулы мерекелеріңізбен құттықтап, дендеріңізге саулық, отбасыларыңызға амандық, бақ-береке тілеймін, – деді бөлім басшысы.
Құрмет пен қошеметке бөленген ардақты жандардың атынан Нысанкүл Әйтенова, Шолпан Иманбаева, Әзімхан Жүнісовтер өз алғыстарын білдіріп, соңғы жылдары білім саласының жеткен жетістерінен құлағдар болып оты­ратындарын және әрбір жетістікке қуанатындарын айтып, ризашылықтарын жеткізді. Өз кезегінде аудандық білім қызметкерлері кәсіподағы комитетінің төрағасы А.Есназар мереке иелерін құттықтап, сый-сияпат жасады.
Салтанатты басқосуда аудандық әуез мектебінің ұстаздары әннен шашу шашып, мерекелік көңіл-күй сыйлады.
Б.Жанәлі
06 қазан 2020 ж. 469 0