Аудандық мәслихаттың кезекті 42-ші сес­сия­сында аудан әкімі Р.Рүстемов ауданда атқарылған жұмыстар мен алдағы мін­деттер туралы баяндады. Сессия отырысына аудандық мәслихат хатшысы Е.Әжікенов, халық қалаулылары, дербес бөлім басшылары, ауыл әкімдері қатысты.

Сессияда аудан басшысы 2019 жылға арналған іс-қимыл жоспарына тоқталып, жап­пай кәсіпкерлікті дамытуға, экономиканы әр­тараптандыруға, инвестиция тартуға, са­лық базасын ұлғайтуға, жаңа жұмыс орындарын ашуға, халықтың әлеуметтік жағдайын жақсартуға, білім беру және денсаулық сақтау мәселелерін шешуге, күнделікті өмірге қажетті инфрақұрылымды дамытуға басымдық беріл­генін атады.

– Ауданда негізінен барлық маңызды салалар бойынша оң көрсеткіштерге қол жет­кізілген. Бұл жөнінде Мемлекет басшысы Қасым-Жомарт Тоқаевтың Қазақстан халқына арнаған «Сындарлы қоғамдық диалог – Қазақстанның тұрақтылығы мен өркендеуінің негізі» атты алғашқы Жолдауынан туындаған мақсат-міндеттерді жүзеге асыру бағытында өткен актив жиынында кеңінен айтылды. Актив жиынында ауданның әлеуметтік-эконо­микалық дамуы мен атқарылуы тиіс жұмыстар да жан-жақты баяндалды. Президент Жолдауында қамтылмай қалған сала жоқ, тұр­ғындардың игілігі үшін қажетті барлық басым бағыт анық көрсетілген. Сондықтан тек іске асыру тетіктерін қарастырып, жұмыс жасауымыз қажет, – деген аудан басшысы әрбір сала жұмысын саралады.

Аудан бюджетінің кіріс көзін ұлғайтатын кәсіпкерлік саласы екені белгілі. Қазіргі таңда сырдариялықтардың кәсіпке бейімделуінің нә­тижесінде салада даму бар. Атап айтқанда, биылғы жылдың 1 шілдесіне дейін ауданда 2200 шағын және орта кәсіпкерлік субъекті тіркеліп, оның 1969-ы жұмыс жасау­да. Кәсіпкерлік субъектілердің жұмыс істеу жөнінен өткен жылдың осы кезеңімен салыс­тырғанда 18,9 процентке артқан. Яғни заман парқын түсінген аудан тұрғындары кәсіпкерлік көкжиегін кеңейтуде.

Сондай-ақ аудан басшысы халықты жұ­мыспен қамту, ауданды газдандыру, жастар мәселесі, денсаулық, білім, мәдениет және өзге салалардағы атқарылған жұмыстар есебін берді. Отырысқа қатысушыларды серпінді Сырдарияны дамыту бағытында бірлесе жұмыс жасауға шақырды.

Өз кезегінде аудандағы кіші және орта кәсіпкерлікті дамытудың жайы және оны жақсарту шаралары туралы аудандық кәсіп­керлік, өнеркәсіп және туризм бөлімінің бас­­шысы Л.Қозыбаева, аудандық полиция бөлімінің жергілікті полиция қызметінің бөлім­ше бастығының есебін қарау және оның қызметін бағалау туралы аудандық полиция бөлімінің жергілікті полиция қызметінің бөлімше бастығы А.Мустафаев, «Сырдария ауданының Құрметті азаматы» атағын беру және «Сырдария ауданының әкімдігі жа­нындағы терроризмге қарсы аудандық комиссияның құрамын бекіту туралы» Сырдария аудандық мәслихатының 2013 жылғы 4 қарашадағы №179 шешіміне өзгеріс енгізу туралы аудан әкімінің орынбасары Д.Байдушев хабарлама жасады.