Тіршілік тынысы Сырдария аудандық қоғамдық-саяси газет
» » Ескірмейтін естелік

Ескірмейтін естелік

Аудандық газеттің жауапты хатшысы, Қазақ­стан Журналистер одағының мүшесі Шаһарбек Бал­табайұлы бізге бағыт-бағдар беріп, ақылын ая­маған алдыңғы буын ағамыз. Аудандық басылым­да еңбек ететін ақылшы ұстазымызбен жақында ақын Келдібай Уәйісовтің отбасында болдық. Қаламгердің қарашаңырағының түтінін түтетіп отырған Әсия апа бізге суреттер альбомын көрсетті. Арасында аудандық газеттің бұрынғы редакторының атақты ақын Жұмекен Нәжімеденовпен түскен суреті де бар екен.
– Бұл Жұмекеннің суреті ғой, – де­ді көп суреттің ішінен ескі суретті аңғарып қалған Шаһарбек аға. Бәріміз жалт қарадық. «Жұмекен деймісің, қай Жұмекен?!» деді Әсия апа көзәйнегінің үстінен зер салып. Анықтап қарасақ, көрнекті ақын Жұмекен Нәжімеденов Келдібай ағамызбен бірге суретке түскен екен.
– Е-е, Жұмекен таңғажайып ақын ғой. Ол егемен еліміздің Әнұранын небәрі 21 жасында-ақ жазған, – деп әңгіме тиегін ағытты Шаһар­бек Бал­табайұлы. Біраздан бері жұба­йының шығармашылығына зер сала­тын адам­дардан жырақтап қалған Әсия апа әңгімені жалғай түсті.
– Иә, ақындар тамаша, шынайы туын­дысын жас кезінде жазады екен ғой. Со­сын олар көпшіл келе­ді. Жұмекенмен түс­кен суретті көріп бі­раз нәр­се есіме тү­сіп отыр. Біздің Келдекең көпшіл болды. Шығар­машылығының арқасын­да көп жерлерді аралады. Үйімізге ақын-жазушылар көп келетін. Асқар Тоқмағамбетовпен, Қалтай Мұхамеджановпен, Қадыр Мырза Әлимен түскен суреті бар еді. Ауданымыздың Құрметті азаматы Қайырбек Асанов біздің отбасылық досымыз. Альбомда Қайырбектің суре­тінен көп сурет жоқ. Ол Келдібаймен өте жақын араласты, – деді ақынның жары.
Ескі альбомды парақтап отырып, ескірмейтін естеліктермен қайта қа­уыш­тық. Келдібай Уәйісұлының жур­налистік іссапар аясында Мәскеуде түс­кен суреттері де бар екен. Сонымен бірге 80 жылдан астам тарихы бар аудандық басылымның ардагерлері Мұхтар Сақтапов, Сергей Тоқсанбаев, Асқар Кіребаевтармен орталық алаңда да естелік суретке түсіпті. Мұнан бөлек ауылдарды аралағанда, жиналыстарда, әдеби кештер мен кездесулерде түскен суреттері көзге ыстық көрінді. Мұның бәрі бүгінде тарихқа, ал азаматтар тұлғаға айналды. Оның ішінде, өмірі де, өлеңі де аңызға айналған Жұмекен Нәжімеденовпен түскен суреті ерекше.
Сурет – тарих. Ал суретке түсу қызығушылық болса, түсіре білу өнер. Кейде бүтін бір елдің құрмет-қошеметіне бөленген тұлғалармен кездесіп, пікір­лесіп жатамыз. Бірақ естелік суретке түсуге мән бермейміз. Ойлап қарасақ, сурет өмір өткелдеріндегі белгілі бір сәтті еске түсіретін құндылық екен...

Ақтөре ИБРАГИМҰЛЫ 
04 ақпан 2020 ж. 167 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам