Ең төменгі жалақының өсуі – халықтың әл-ауқатын арттыруға бағытталған маңызды қадам

Мемлекет басшысының бүгінгі Жолдауын көріп, елдің әлеуметтік-экономикалық дамуына қатысты көтерілген мәселелерге ерекше назар аудардым. Соның ішінде ең төменгі жалақы мөлшерін 85 мың теңгеден 110 мың теңгеге дейін арттыру және алғашқы медициналық-санитарлық көмек жүйесінде еңбек ететін мамандардың жалақысын 40 пайызға дейін көтеру жөніндегі тапсырмалар қоғам үшін маңызы зор бастамалар деп есептеймін.

Ең алдымен, ең төменгі жалақыны 110 мың теңгеге дейін көтеру – халықтың табысын арттыруға, әлеуметтік қолдауды күшейтуге бағытталған нақты қадам. Өйткені жалақы – адамның күнделікті тұрмыс-тіршілігінің, отбасының әл-ауқатының, ертеңгі күнге деген сенімінің негізі. Әсіресе, бюджет саласында еңбек ететін, табысы шектеулі азаматтар үшін әрбір қосымша теңгенің маңызы бар.

Айтулы бастаманың нәтижесін тек жалақы көлемінің өсуімен ғана бағалауға болмайды. Ең маңыздысы – халықтың нақты сатып алу қабілетінің артуы. Егер жалақы көбейгенімен, азық-түлік пен күнделікті қажетті тауарлардың бағасы да қатар өссе, табыстың артуы азаматтардың тұрмысынан толық көрініс таппауы мүмкін. Сондықтан ең төменгі жалақыны көтеру шарасы бағаның тұрақтылығын қамтамасыз ету, инфляцияны тежеу және әлеуметтік осал топтарды қолдау саясатымен қатар жүруі қажет.

Жолдаудағы мен үшін ерекше маңызды бағыттың бірі – алғашқы медициналық-санитарлық көмек жүйесін дамыту және осы сала мамандарының еңбегін бағалау мәселесі. Мемлекет басшысының учаскелік қызмет мамандарының жалақысын үздіксіз еңбек өтіліне қарай 40 пайызға дейін арттыру жөніндегі тапсырмасы медицина қызметкерлерінің әлеуметтік жағдайына көңіл бөлудің маңызын көрсетеді.

Өйткені алғашқы медициналық көмек – денсаулық сақтау жүйесінің ең негізгі буыны. Адам сырқаттанғанда алғаш жүгінетін, аурудың алдын алуға, ерте анықтауға, созылмалы дерттерді бақылауға және тұрғындарға медициналық кеңес беруге атсалысатын мамандардың жауапкершілігі жоғары. Әсіресе, ауылдық жерлерде медицина қызметкерлерінің орны бөлек. Олар тек ем жүргізіп қана қоймай, халықпен етене байланыста жұмыс істейді, әрбір отбасының денсаулығына алаңдайды.

Сондықтан медицина қызметкерлерінің жалақысын арттыруды тек қаржылық қолдау деп емес, денсаулық сақтау саласының сапасын жақсартуға бағытталған шара ретінде қарастырған жөн. Еңбегі лайықты бағаланған маманның кәсіби дамуға, қызмет сапасын арттыруға және өз жұмысына ұзақ мерзім бойы жауапкершілікпен қарауға мүмкіндігі артады. Сонымен бірге бұл бастама білікті кадрларды ауылдық жерлерде сақтап қалуға және алғашқы медициналық көмектің қолжетімділігін арттыруға ықпал етуі мүмкін.

Жалпы алғанда, Мемлекет басшысының Жолдауында көтерілген бұл мәселелердің түпкі мәні – адам еңбегінің қадірін арттыру, халықтың тұрмыс сапасын жақсарту және әлеуметтік әділеттілікті нығайту. Экономиканың дамуы ең алдымен азаматтардың күнделікті өмірінен сезілуі тиіс. Халықтың табысы артып, сапалы медициналық көмекке қолжетімділігі жақсарса, мұның өзі елдің тұрақты дамуына негіз болады.

Менің ойымша, кез келген реформаның шынайы нәтижесі оның қағаз жүзіндегі көрсеткіштерімен емес, қарапайым халықтың өміріне әкелген оң өзгерістерімен өлшенеді. Сондықтан жалақыны көтеру жөніндегі бастамалар нақты іске асып, инфляцияның әсері ескеріліп, еңбек адамының мүддесі басты назарда болғаны жөн.

АРУЖАН МҰХАНБЕТҚАЛИ,

"Тіршілік тынысы" газетінің бас редакторы