Медицина қызметкерлерінің еңбегін бағалау – денсаулық сақтау саласының дамуына қосылған үлес

Президент Қасым-Жомарт Тоқаевтың 2027 жылдың 1 қаңтарынан бастап учаскелік медициналық қызмет мамандарының жалақысын үздіксіз еңбек өтіліне қарай 40 пайызға дейін арттыру жөніндегі тапсырмасы – медицина саласы үшін маңызды қадам.

Дәрігер мен медицина қызметкерінің еңбегі – адам өмірі мен денсаулығына тікелей жауапты, үлкен жауапкершілікті талап ететін қызмет. Әсіресе, алғашқы медициналық-санитарлық көмек мамандары халықпен тығыз байланыста жұмыс істеп, аурудың алдын алуға, дертті ерте анықтауға және тұрғындардың денсаулығын сақтауға зор үлес қосады.

77 мыңнан астам маманды қамтитын бұл бастама медицина қызметкерлерінің әлеуметтік жағдайын жақсартуға, олардың еңбегін лайықты бағалауға және саладағы білікті кадрларды сақтап қалуға ықпал етуі мүмкін. Өйткені медицина сапасы заманауи құрал-жабдықтармен ғана емес, білікті әрі өз еңбегінің бағаланатынын сезінетін мамандармен де өлшенеді.

Менің ойымша, медицина қызметкерлерін қолдау – халықтың денсаулығына жасалған инвестиция. Еңбегі еленген маманға кәсіби дамуға және сапалы қызмет көрсетуге қолайлы жағдай қалыптасады. Ең бастысы, бұл бастама нақты жүзеге асып, оның игілігін медицина мамандары мен халық сезінуі керек.

Денсаулық сақтау саласын нығайту – ел болашағын нығайту. Ал адам өмірін сақтауға еңбек етіп жүрген мамандардың еңбегін бағалау – қоғам алдындағы маңызды міндет.

Жанар ЖҰМАБАЕВА,
Сырдария аудандық ауруханасының бас дәрігері