Тіршілік тынысы Tirshilik-tynysy.kz ақпараттық агенттігі

№ 56 газет

16 шілде 2024 ж.

№ 55 газет

13 шілде 2024 ж.

№54 газет

10 шілде 2024 ж.

Жаңалықтар мұрағаты

«    Шілде 2024    »
ДсСсСрБсЖмСбЖс
1234567
891011121314
15161718192021
22232425262728
293031 
» » Ертеңі жарқын елорданың тұрғындары

Ертеңі жарқын елорданың тұрғындары

Есіл өзенінің жағалауында орналасқан арман қала Астананың келбетіне тамсана қарамайтын жан кемде-кем. Сұлулығына көз тоймайтын әсем қала қазақстандықтардың мақтанышына айналды. Жыл сайын қаланың халық саны да артып, әлемде ең жылдам дамыған қаланың бірі ретінде танылып отыр.

Еліміздің бас қаласы мәртебесін алған кезден бастап, арман қалаға ағылған жұрт жаңа астананың қа­лып­­тасуына үлес қосуға асықты. Таң­ғажайып дархан даламыздың орта­­сында орналасқан қала тұрғын­дарының арасында өз бақыты мен қуанышын тапқандары қаншама?!

Бүгінде тереңөзектік жерлесіміз Қанат Рахметұлы отбасымен Астана тұрғы­нына айналды. Олар өткен жылы елордаға көшіп, биыл Астана қаласы­ның туған күнін екінші мәрте отбасымен атап өтпекші.

– Жұбайым Аида Бекбердіқызы – Тараздың тумасы. 2006 жылы шаңы­рақ көтеріп, ата-анамыздың риза­шылығын алдық. Содан бері тату-тәтті отбасылық өміріміз жалғасын тауып, өмірге келген балаларымыз көз қуанышымызға айналды. Алған білімі­міз­бен туған жерге қызмет етіп, өз маман­дығымыз бойынша біраз жыл тәжірибе жинадық. Енді міне, Астана қаласының тұрғыны атанғанымызға екі жыл­ға аяқ басты. Балалар үйренісіп қал­ды. Әрине, туған жерден жыраққа кету оңай емес, сағынышымыз біразға дейін басылмады. Бірақ Астана бізді жат­­сын­бады. Жаңа орта, жаңа қызмет­тің арқасында ару қаланың тіршілігіне үйреніп келеміз. Қазір Астана қалалық №4 автопаркте колонна бастығы болып қызмет атқарамын. Біз секілді отба­сыларға мол мүмкіндік берген елор­даға алғысымыз шексіз! Жасай бер­сін, дами берсін, ару қала, – дейді Қанат Рахметұлы.

Жас отбасының өз өмірлерін Астанамен байланыстыруы заңдылық. Күн сайын жасара түскен Астана шын мәнінде жастарды өз бауырына ерік­сіз тартады. Алып шаһар жастар үшін ең алдымен шексіз мүмкіндіктер мен асқан арман, биік мақсаттың орындалуына жол ашқан алтын кілт іспетті.

Болашағын осы қаламен байланыс­тыру үшін шешім қабылдаған ерлі-зайып­тылар бұл бетбұрысқа ешқашан өкін­бейтіндерін айтады. Себебі өсу мен оқуға, өзін дамытуға көп мүмкіндік беретін қолайлы қаланың сұлу таби­ғаты адамның ішкі жан дүниесін де ерекше сезімге бөлейді.

– Сыр еліне келін болып түстім, ата-енем өте керемет жандар. Марқұм атам ішкі істер органында қызмет атқарған. Енемнің тұңғыш келіні бол­ған­­дықтан маған қызындай қарады. Бізге үнемі қолдау білдірді. Негізінен екі мамандығым бар. Жер кадастры мен заңгер. Жер саласында жерге орналастырушы болып еңбек жолымды бастағанмын. Қызылорда қаласында осы салада қызмет атқардым. Қатар­дағы маманнан бастап бас маман, кадр бөлімінің басшысы қызметіне дейін көтерілдім. Саладағы жетістігім – тәжірибе жинағаным. Қазір екі жыл­дан бері «Азаматтарға арналған үкімет» мемлекеттік корпорациясы ком­мерциялық емес акционерлік қоғамының Астана қаласы бойынша филиалды НR дамыту басқармасының басшысымын. Әрине, Астана қаласына қоныс аудару үшін көп ойландық және балаларымыздың болашағы үшін отаға­­сымен бір шешімге келдік. Міне, енді біз астаналықтармыз. Қала бізге керемет ұнайды. Әдемі, тұрғындары да жақсы, әсіресе, қыс мезгіліндегі қарды ұнатамын. Қатты ыстық болмайды. Мұнда жұмыс түрі өте көп, жұмыссыз қаламын деп қорықпайсың. Бізге дамуға, өсуге мүмкіндік берген Астанаға мың алғыс, – дейді сырдария­лық келін Аида Рахметова.

Жарқын болашаққа деген бас­тау болған Рахметовтер отбасында қос бірдей перзент өсіп келеді. Тұңғыштары Дінмұхаммед келесі жылы мектеп бітіреді. Ару қыздары Аянат та мектеп оқушысы. Бүгінде бала­ларының жақсы білім алуына бар жағдайын жасаған ата-аналарының атқарып отырған қызметі, баспанасы бар. Олар биылғы жылы өз баспаналарына қол жеткізіп, отбасы қуанышы еселене түсті.

Рахметовтер отбасы жыл са­йын ерекше атап өтілетін қала күнін асыға күтеді. Себебі бұл күні Астана күндегіден де ажарлана түседі. Шам­дары жарқыраған әсем қаланың әр түкпірінде мерекелік көңіл-күй сезі­леді. Бір сәтке күйбең тірлектен босап, отбасымен қала күнін атап өтетін жерлестерімізге мереке құтты болсын дейміз.

Бибісара ЖАНӘЛІ
06 шілде 2024 ж. 318 0