Негізінен байқау екі кезеңнен тұрды. Бірінші кезеңде байқауға қатысушы әрбір талапкер өзін таныстырып, еркін тақырыпта, дәстүрге байланысты немесе авторлық батасын нақышына келтіре жат­қа айтса, екінші кезеңде әділқазы алқасы ұсынған тақырыпқа сәйкес, бата беру жүзеге асты. Қариялардың өнеріне Аманкелді ауылдық ардагерлер кеңесінің төрағасы Нұрмағанбет Рысбайұлы, мәдениет саласының ардагері, мәдениет саласының үздігі, ҚР еңбек сіңірген төсбелгілерінің иегері Жұмағазы Оразов, аудандық мәдениет үйінің әдіскері Нағипа Алданиязова төрелік етіп, әділ бағасын қойды.

– Халқымызда той-думанда, ас-жиында, тіпті дастарқан басында да бата беру дәстүрге айналған. Бұл – бір жағынан тәрбиелік құрал, екінші жағынан ұрпақ жалғастығының белгісі. Аға буын өкілдері немере­леріне бата беру арқылы олардың жүрегіне ізгілік дәнін сепкен. Осындай жастарға үлгі болар сайыстар жиі болсын, – дейді ардагерлер кеңесінің төрағасы Нұрмағанбет Рысбайұлы.

Байқау қорытындысында жеңіс тұғырынан көрінген бас жүлде иегері аманкелділік Найзабек Әбдуов болды. І орынды шіркейлілік Шолпан Әбдіманова жеңіп алды. Ал ІІ орынды Іңкәрдария ауылынан Гүлмұрат Қарабеков алды. ІІІ орынды Сәкен Сейфуллин ауылынан сайысқа қатысқан Жүрсінбек Анасов еншіледі. Жеңімпаздар мен барлық қатысушыға арнайы диплом мен сыйлық табысталды.