Тәуелсіздік – айбарым, тұғырлы болсын байрағым
Өткен аптада ҚР Тәуелсіздігінің 30 жылдығы аясында Нағи Ілиясов ауылдық мәдениет үйінің ұйымдастыруымен «Тәуелсіздік айбарым, тұғырлы болсын байрағым» тақырыбында аудандық онлайн ән байқауы өткізілді. 9 талапкер қатысқан байқау екі кезеңді қамтыды.Байқаудың бірінші кезеңіңде өнерпаздар патриоттық ән шырқады. Екінші кезеңде еркін тақырыптағы әндерін ұсынды. Өз кезегінде өз саласының майталмандары байқауға қатысушылардың өнеріне баға берді. Әрбір талапкердің ән орындау шеберлігі, репертуар таңдауы, вокалдық білімі сараланды.
– Қазақ елі үшін ең ұлық мереке – ҚР Тәуелсіздігінің 30 жылдығы аясында түрлі іс-шара өткізу жоспарланған. Елімізде орын алған пандемияға байланысты ән байқауы онлайн форматта ұйымдастырылды. Қастерлі мерекенің ұлт үшін маңыздылығы жоғары. Тәуелсіздігіміз тұғырлы, егемендігіміз баянды болсын, – дейді Нағи Ілиясов ауылдық мәдениет үйінің меңгерушісі Нұрбол Тұранов.
Патриоттық байқау қорытындысында бас жүлдені асқарлық Абылайхан Бәйділдаев жеңіп алды. Жүлделі І орынды нағилық, Ақбота Русланова, ІІ орынды аудандық мәдениет үйінің атынан қатысқан Әйгерім Үсенова, ІІІ орынды қоғалыкөлдік Бағлан Қараман мен бесарықтық Айбаршын Бисенова иеленді. Жеңімпаздар мен жүлдегерлерге арнайы диплом мен бағалы сыйлық табысталды.
Балтабай ОРДАБЕКОВ
