Тіршілік тынысы Tirshilik-tynysy.kz ақпараттық агенттігі
» » Ауыл мәдениетіне қан жүгірткен

Ауыл мәдениетіне қан жүгірткен

Жауапкершілігі мол саланың қазанында қайнаған менің кейіп­керім ауыл мәдениетінің жұмы­сын өркендетуге күш салып келеді. Сахнада әнімен көпті еліткен өнерпаз болса, қызметте сан ­алуан бағытты үйлестіре білген тәжірибелі басшы Әсел Ибраева бар мақтауға лайықты.

Қашанда үлкен мен кішінің көңілін таба алатын өнер адамы өз ісінің білгірі саналады. Осыдан бірнеше жыл бұрын ақиық ақын Асқар Тоқма­ғам­бетов ауылының келіні атанған ол Жалағаш ауданына қарасты Жаңаталап ауылында дүниеге келген. Өз ауылындағы №117 Ә.Оңалбаев атындағы орта мектепте білім алып, кішкентайынан өнерге әуес болған. Ең бірінші кезекте оны өнер сахнасына алып шыққан отбасы екен. Осылайша, ата-анасының үмітін ақтауға барын салған өнерлі жан мектеп бітіргеннен кейін Қорқыт ата атындағы Қы­зылорда мемлекеттік универ­сите­тінің «Музыка және ән айту» факультетіне оқуға қабылданады. Сүйік­ті мамандығы бойынша білімін жетілдірген жас маман осыдан 23 жыл бұрын музыканың қыр-сырына толықтай қанығып, ерекше мамандықты меңгеріп шығады.

– Ең алғаш сахнаға шыққанымда 5 жаста бола­тын­мын. Облыстық дәрежедегі іс-шарада ән шырқаға­ным әлі есімде. Отбасымызда 5 ағайындымыз. Әкем Қалдан механизатор болып жұмыс жасады. Анам Ұлтай – кітапхана саласының маманы. Негізінен, әкем өнерге жақын. Оның қоңыр дауысы көпшілікті тәнті ететін. Міне, әкенің қанымен дарыған өнерді дамытып келемін. Ең алғаш еңбек жолымды «Балау­са» балалар бақшасында әуез жетекшісі ретінде бас­тадым. Іргелі ұжымда 6 жыл қызмет етіп, ауылдағы білім ошағына ауыстым. Мұнда балаларға ән өнерін меңгертуге зор үлес қостым, – дейді білікті маман.

Білім саласында қажырлы еңбек еткен өнер адамының мәдениеттегі қызметі осындан 9 жыл бұрын басталған еді. Қырғи тілді ақын Асқар Тоқмағамбетов ауылында мәдениет саласын дамыту негізгі міндетіне айналды. Жаңа бастамаларға иек артып, ауыл өнер­паздарының есімін елге танытуды мақсат етті. Мың бір түрлі қызметтің басы-қасынан табылатын талапшыл басшы айналасына жастарды жиып, ауыл мәдениетін өркендетіп, зор жетістіктерге қол жеткізе білді. Оның шәкірттері де түрлі деңгейдегі байқауларда биік белестерді ба­ғындырып жүр. Бір ғана мысал, жақында ғана Алматы қаласында өткен респибликалық байқауда өнерлі шәкірті Марфуға Әубәкірова әуелете ән шырқап, І орынды жеңіп алды.

– Ауыл мәдениетін көтеру жолында аянып қалма­сымыз анық. Үйірмелер ашып, ақылы қызметті үйлестіріп, іс-шара ұйымдастыру барысында талай қиындық пен қызықты бастан өткердік. Талай кем­шін тұс­тардың алдын алып, ауыртпалықты еңсердік. Әрине, көрерменнің көңілінен шығу оңай емес. Осын­дай сәттерде табандылық танытып, үлкен буын­ның айтқан ақылына, озық тәжірибесіне сүйенеміз, – деді Ә.Ибраева.

Биязы, байсалды қалпынан таймайтын мәдениет майталманы жолдасы Сахан Бекжановпен бірге 4 пер­зент тәрбиелеп отыр. Өмірлік серігі – ауылда мал дәрігері.

Сала жұмысын жандандырудағы еселі еңбегі елеусіз емес. Соған лайықты құрмет ретінде кеше ғана облыс әкімінің Алғыс хатын иеленді.

Балтабай АЯБЕКҰЛЫ
23 мамыр 2023 ж. 119 0