Қазақ зағиптар қоғамына – 85 жыл

Биыл қазақ зағиптар қоғамына - 85 жыл толды. Айтулы күнге орай аталған қоғамдық бірлестіктің ұйымдастыруымен ауданда мерекелік іс-шара өтті. Сырдария спорттық зияткерлік клубында көз мүгедектерінің арасында дойбыдан жарыс өтіп, жеңімпаздарға арнайы диплом және жеке кәсіпкер Е.Бақторазовтың демеушілігімен сый-сияпаттар ұйымдастырылды.

Сонымен қатар аудандық мәдениет үйінде өткен салтанатты шарада аудан әкімінің орынбасары Талғат Нұртазаев бірқатар зағип жандарға алғыс табыстап, мерекемен құттықтады.

– Бұл қоғамдық бірлестіктің ең басты мақсаты - оған мүше адамдардың құқықтары мен мүдделерін қорғау, зағиптар мен нашар көретін жандарға барынша қолдау көрсету болып табылады. Сіздер қоғамдық ортада өздеріңізді тең ұстау үшін мемлекет тарапына үлкен қолдаулар жасалуда. Бұл жұмыстар әрқашан жалғасын табатын болады, – деді Талғат Мейрамханұлы өз сөзінде.

Сырдария ауданы әкімінің баспасөз қызметі