Зейнеткерлік демалысқа – зор құрметпен

Әрбір еңбек адамы зейнет жасына жеткенде әріптестері зор құрмет­пен, ыстық ықыласпен салтанатты түрде зейнеткерлікке шығарып салса, ол адам үшін одан асқан қуаныш жоқ. Бұл құрметті ұзақ жылғы еңбек пен ізденістің жемісі деп бағалауға болады. Жақында Аманкелді ауылындағы №42 Қ.Баймағанбетов атындағы мектеп-лицейінде осындай жақсы іс-шараның куәсі болдық.

Білім ордасында «Ардақты ұстаз, асыл әке» тақырыбында ғибратты, көңіл толқытарлық, салта­натты кеш ұйымдастырылды. Кештің қадірлі иесі – кісілік келбетімен, адалдық, адам­гершілігімен ерекшеленетін, ғұмырының 40 жылын жас ұрпаққа білім беруге арнаған ардақты ұстаз Құлымбетов Ерғали Шегенұлы.

Ауыл халқы «Ерғали ағай» деп атап кеткен ардақты азаматтың шәкірт тәрбиелеп, білім нәрімен сусындатудағы, жас буынға дұрыс бағыт-бағдар беру жолындағы еңбегі ұшан теңіз. Оқушылары бүгінде түрлі мамандық иесі атанып, елі үшін жемісті еңбек етуде. Шәкірттерінің бірқатары өзі секілді ұстаздық жолды таңдағанын да айтып өткеніміз дұрыс. Сондықтан салтанатты іс-шара ұстаздың өмір жолымен таныстырудан басталып, ән-жырмен, ақ тілек лебіздермен жалғасты.

Айта кетейік, Ерғали Шегенұлы сонау 1981 жылы Аманкелді кеңшарында диспетчер ретінде еңбек жолын бастап, кейіннен кеңшар комсомол комитетінің хатшысы болып қызмет атқарған. Өз жұмысына жауапты, тиянақты маман сондай-ақ әскери жетекші ретінде де жұмыс істеген. Ал 1993-1997 жылдары мектеп директорының тәрбие ісі жөніндегі орынбасары болып, адал еңбегінің арқасында ұжым­дастарының арасында абыройға ие бол­ған. Еңбек ету мен оқуды ұштастырған азамат Қорқыт Ата атындағы Қызылорда педа­гогикалық институтында «Тарих-адам және қоғам» пәнінің мұғалімі мамандығы бойынша білім алған. Бертін келе, яғни 2012 жылы «Болашақ» университетін «Бастапқы әскери дайындық» пәні мамандығы бойынша тәмамдаған. Соңғы жиырма бес жылдан бері ауылдағы білім ордасында алғашқы әс­кери және технологиялық дайындық пәнінің оқытушы-ұйымдастырушысы болып жұмыс істеп келді. Жұбайы Марияш Бейбітова да ұстаз. Ол кісі математика пәнінен дәріс беріп, бүгінде бейнетінің зейнетін көруде. Шәкірттері шыңға шыққан қос ұстаз отбасында екі ұл тәрбиелеп өсірген.

– Ардақты ұстаз ұзақ жылдар жемісті еңбек етіп, білім биігінен көріне білді. Көптеген марапаттарға ие болды. Атап айтқанда, «Отан» Республикалық қоғамдық бірлестігі Қызылорда облыстық филиалының, Сырдария ауданының қорғаныс істері жөніндегі бөлімі бастығының, аудандық білім бөлімі мен жастар ресурстық орталығы директорының Алғыс хатын иеленді. Облыстық білім басқармасы мен білім және ғылым қызметкерлері кәсіподағының облыстық комитетінің Құрмет грамотасымен де марапатталды. Ұлағатты ұстаз Ерғали Шегенұлы Семей ядролық полигонының ардагері ретінде де жастарға патриоттық бағытта тәлім-тәрбие беруге айрықша үлес қосып келеді. Біз әріптесіміздің ҚР Қарулы күштеріне 25 жыл, Жергілікті әскери басқару органдарына 100 жыл, Сырдария ауданының құрылғанына 90 жыл және Семей ядролық сынақ полигонының жабылғанына 30 жыл төсбелгілерімен мара­пат­­­талғанын мақтаныш санаймыз, – деді мектеп-лицей директоры З.Жаманқұлов.

Айтып өту керек, ұстаз өз шәкіттерімен бірге республикалық «Айбын» әскери-патриоттық жиынының аудандық кезеңінде, «Біз Тәуелсіз елдің ұрпағымыз» әскери-қолданбалы спорт түрлерінен аудандық жарыста І орынды жеңіп алған. Сонымен қатар аудандық «Жас мерген-2017» сайысында ІІ орын, Қызылорда облы­сына 200 жыл және Сырдария ауданынына 90 жыл толу мерекесіне орай өткізілген аудандық сайыста ІІІ орын иеленіп, марапат биігінен көрінген. Бұл туралы іс-шараға қаты­сушылар кеңінен айтты.

– Ерғали Құлымбетовті өмірден тоқығаны мол, кемел ойлы тұлға ретінде әріптестері ерек­ше құрметтейді. Терең білімі, берік ұста­нымы, іскерлік қабілеті және азаматтық қасиет­тері жақын араласқан жанды тәнті етпей қоймайды. Атына заты сай ұлағатты ұстаз жастарға үлгі, өнеге. Еңбек пен тұрмыс тәрбиесі, жеке басының кіршіксіздігі отбасы үшін ғана емес, қанаттас жүрген әріптестері, тілектес дос-жаран үшін де зор мақтаныш. Ұстаз­­­дың өмір жолы жас ұрпақ үшін нағыз өмір мектебі, – деп қорытындыланды салтанатты іс-шара.

Жиын соңында ұстаз құрмет көрсеткен әріптестеріне шынайы ризашылығын білдірді.

Ақтөре ИБРАГИМҰЛЫ