Балалардың жазғы демалысы қалай ұйымдастырылады?

Тағы бір оқу жылы аяқталып, мектеп оқушы­лары жазғы демалысқа шы­қты. Өткен жылдары балалардың демалысын ұйымдас­тыруда елдегі пандемиялық жағдай кедергі болды. Жыл сайын мектеп жанынан ашылатын күн­діз­гі тынығу лагері мен сырттағы тынығу орын­да­рының жұмысы тоқтап, балалардың жаз­ғы демалысы ұйымдастырылмады.

Биыл эпидемиологиялық ахуал тұрақталғаннан кейін білім мекемелері оқушыларды жаңа оқу жылынан бастап мектепте оқытып, жазғы демалысты ұйымдастыруды қолға алынды.

Балалардың жазғы демалысын ұйымдастыру – білім саласы үшін маңызды мәселе. Тоғыз ай бойы мектепте оқып, жазғы демалысқа асыға жеткен балалардың жақсы демалуына жағдай жасау алдын ала әзірленеді, іс-шара жос­пары бекітіледі. Әсіресе, денсаулықты нығайтуға, шығар­машылық, танымдық қабілетті арттыруға басымдық бе­рі­леді.

Мектеп жанынан күндізгі тынығу ла­герь­лері ашылса, кент, қала сыртынан жазғы демалыс мезігілінде сауықтыру, тынықтыру ауысымдары жұмыс істейді. Биыл мектеп жанынан күндізгі лагерь жатын орынсыз және ыстық тамақсыз ұйымдастырылады. Оған аудан бойынша 5 мың оқушы қамтылады. Күндізгі тынығу лагері аудандағы 17 мектепте 26 мамыр мен 17 маусым аралығында жұмыс істейді.

Демалыспен 100 пайыз қамта­масыз етіледі

Жазғы маусымдағы демалысты ұйым­дастыруда ең алдымен жетім және ата-ана қамқорлығынсыз қалған балалар мен аз қамтамасыз етілген отбасы балаларына маңыз берілетіні заңдылық. Олар 100 пайыз тегін демалыспен қамтылады. Білім бөлімі берген мәлімет бойынша биылғы оқу жылында аудан мектептерінде 7811 бала білім алған. Оның 1660-ы жоғарыда аталған санаттағы балалар. Жазғы демалысты ұйымдастыру міндетті оқу қоры, демеушілер мен кәсіподақ және ата-аналар есебінен жүргізіледі. Бұл жайын­­да аудандық білім бөлімінің басшысы Б.Жәні­беков айтып берді.

– Жазғы демалыс – оқушылардың бос уақытын тиімді өткізуге берілетін мүм­кін­дік. Мектептегі сабақта бала білім алып, ой-өрісін кеңейтсе, демалыс кезін де қабілетін дамытып, ерекше қызықты, есте қаларлықтай етіп өткізуі керек. Ол үшін ұстаздар қауымы мен ата-аналар балалардың тынығу лагеріне баруына жағ­­­­дай жасаса деген тілегіміз бар.

Биылғы жылы ауданның барлық мек­тептерінде жазғы мектеп жұмыс істейтін болады. Оқу жылының соңғы күнінің ер­тесінен бастап балалар мектепке келуіне болады. Бұл жолы оқушылар оқу­лықтарын арқаламай, еркін, өзіне ыңғайлы киіммен келуіне мүмкіндік бері­леді. Мұғалімдер 17 мау­сымға дейін күн сайын негізгі пәндер бо­йынша жұмыс жасаса, негізгі бөлігінде та­нымдық, саяхат, демалыс ұйымдастыру жағына көңіл бөледі. Балаларды жалық­тыр­май, әрі білімдерін толықтырса, екін­ші­­ден, ой-өрі­сін дамытатын болады.

«Жалын» есігін айқара ашады

Биылғы жылы кент сыртындағы «Жалын» сауықтыру лагері өз тынығушыларын қабылдайтын болады. Сауықтыру лагері 1988 жылы пайдалануға берілген. Тип­тік жобада салынған. Бір ауысымда 130 ба­ла­ны қамтуға мүмкіндігі бар. Лагерь аумағында 12 ғимарат орналасқан. Лагерь­де 9 жатын орынға арналған тұрғын үй, 1 дәрігерлік бекет, 1 әдістемелік ор­талық және 130 орынға арналған асхана бар. Сонымен қатар ашық спорт алаңы, сыртқы душ, көлеңкелі шатырлар, мәдени іс-шара өтетін орын мен суға шомылатын жағажай бар. Лагерь 1 маусымнан бастап балалар қабылдайды. Жалпы 6 ауысымда 700 баланы демалдыру жоспарланған. Оның ішінде 581 бала міндетті оқу қоры, 119 бала кәсіподақ ұйымы есебінен демалады. Бір ауысым 10 күнге созылады. Жалпы жолдама құны 25 мың теңге. Әр ауысымға атау беріліп, арнайы үйірмелер жұмыс істейтін болады. Оқушылар үйінің қолөнер, бейнелеу өнері, роботехника, волейбол, ағылшын тілі т.б. үйірмелерде тыны­ғушылар шығармашылықпен айна­лы­­сып, денсаулықтарын нығайтады. Сон­­­дай-ақ әрбір ауысымда мектептің педа­гог-психологтары «Психолог саға­тын» өт­кі­­­­­зе­ді. Аудандық мәдениет және тіл­дер­­­ді дамыту бөлімі тарапынан лагерьде бала­лар кітапханасы жұмыс жасаса, спорт және дене шынықтыру бөлімі, жас­­тар ресурстық орталығы ұлттық ойындар, эстафеталық сайыстар мен танымдық кеш­тер өткізуді жоспарлаған. «Жалында» бала­лардың таза ауада тынығып, де­малуына барлық жағдай жасалған.

«Жалын» сауықтыру лагерінің директоры М.Момбаева:

– Биыл 1 маусымнан бастап лагерь­ге бала қабылдаймыз. Лагерьде тынығу­шыларды жақсы демалдыруға мүмкіндік бар. Ағымдағы жөндеуден өткізуге бюджеттен 3 миллион теңге бөлінді. Лагерь аумағында көркейту-көгалдандыру, сани­тарлық тазалық жұмыстары жүргізілді. Дезин­фекция, дератизация жұмыстары арнайы мекеме арқылы жасалды. Сараптама орталығымен өндірістік бақылау жүр­гізу үшін, яғни су, топырақ, тамақ, жарық т.б. сынамаларға келісім-шарт жасал­ды. Тиісінше санитариялық-эпиде­мио­­­­ло­­гиялық, өрт қауіпсіздігі бойынша қоры­­­тынды алынды. Балалар қауіпсіздігі мен қоғамдық тәртіпті сақтау мақсатында аудандық полиция бөлімінен бөлінген тәртіп сақшылары тәулік бойы кезекшілік жасайды. Жауапты бала дәрі­гері мен медбике де бөлінді. Стамотолог дәрігер профилактикалық жұмыс жүр­гізеді.

Балалар жылы тынығушылар тегін демалады

Балалар жылы балалардың облыс кө­ле­мінде және облыстан тыс лагерьде демалуына мүмкіндік берді. Мұндай тегін демалыс демеушілердің есебінен жүргізіледі.

– Биылғы маусымда облыстық бі­лім басқармасына қарасты «Талдысу», «Қамбаш» тынығу лагерінде кәсіп­одақ есебі­нен 100 бала демалады. Демеу­ші­лердің айтулы жыл аясында аз қам­та­масыз етілген отбасының 100 баласына Алматы облысы, Есік қаласында орналасқан «Тау Жанашар» лагеріне жолдама беріледі. Бүгінде нақты 80 баланың жолдамасының қаржысы шешілсе, қал­ған жолдамалар бойынша демеушілер та­бу жұмыстары жүргізілуде. Мұнан бас­­­қа республикалық бюджет есебінен «Бал­дәурен – Қапшағай» лагеріне 16 ба­ла, «Бал­дәурен – Шымкент» лагеріне 24 ба­ла, «Балдәурен – Көкшетау» лагеріне 16 бала – барлығы 56 бала демалатын болады, – дейді білім бөлімінің басшысы.

Шын мәнінде балалардың жазғы демалысына әрбір ата-ана жауапты. Қала сыртындағы лагерьдің жолдамасын көп­тің қалтасы көтермеуі мүмкін. Сон­дық­тан ата-аналар балаларының мектеп жанындағы күндізгі лагерьге баруына жағдай жасаса, бала күн ұзағына қараусыз қалмайды. Ата-аналар алаңсыз жұмысын істеуге мүм­кіндік алса, балалар белсенді тыны­ғып, денсаулықтарын нығайтады.

1000 бала тарихи орындарға саяхатқа шығады

Балаларды тарихи-танымдық орындар­ға саяхатқа апару – жазғы демалыс жос­парына енген. Биыл аудан мектептері бойынша мың баланы осындай экскурсиямен қамту ұйымдастырылмақ. Оның бағдарламасына Түркістан, Қызылорда қаласына, Қорқыт ата кесенесіне, елді-мекен аумағындағы тарихи орындарға сая­­­­хат жасау енген. Жақында №35 И.Тоқ­тыбаев атындағы мектеп-лицейдің ұйым­дастыруымен жоғарғы сынып оқушы­лары Түркістан қаласындағы Қожа Ахмет Яссауи кесенесіне саяхатқа барды. Балалар көне Оты­­рар қаласының тарихымен танысып, ескерткіш туралы көп мәлімет алды. Жан­данған, жаңарған Түркістан шаһарын аралап, рухани демалды.

Жалпы айтқанда биылғы жылы жаз мау­­­­­­сымында демалыс орындары­мен 6 мың, экскурсиямен 1 мың бала демалыс­пен қам­тылады. Бұл тиісін­ше демалуға тиіс­ті балалардың 90 пайызын құрайды. Ал әлеуметтік қол­дауды қажет ететін отбасы балалары 100 пайыз демалады.

Түйін

«Жаз жайнатып, күн күлдіріп, біз лагерьге барамыз» деп ән салдырған көңілді жаз мезгілінде бала демалысы осылайша жоғары деңгейде ұйымдастырылатын болады. Демалыс орындарында балалардың қауіпсіздігін сақтау білім бөлімінің бақы­лауына алынады. Сондықтан тілсіз жаудың құрбаны болмау үшін ата-аналар тарапынан қатаң бақылау қажет. Табиғат аясына демалысқа барғанда от, су қауіпсіздігі ережесін сақтап, арнайы жағажайда суға түскен жөн. «Сақтансаң – сақтайды» деген қағиданы ұстанып, қараусыз бала болмауы тиіс.

Бибісара ТАҢАТАРҚЫЗЫ