Өлшеусіз еңбек иесі
Қазақтың ақыны, педагог, ағартушысы Ахмет Байтұрсынұлы «Мектептің жаны – мұғалім. Мұғалім қандай болса, мектеп сондай болмақшы. Яғни, мұғалім білімді болса, ол мектептен балалар көбірек білім алып шықпақшы. Солай болған соң, ең әуелі мектепке керегі – білімді педагог, методикалық шеберлігі мықты мұғалім, жақсы оқыта білетін мұғалім» деді.Ардагер-ұстаз Бейсенкүл Бакирова өз пәнін жақсы білумен қатар, білгенін балаға үйрете білген ұстаздардың қатарынан. Ол өз мамандығын шын сүйетін мұғалім, нағыз ұстаз деген атқа лайық болу үшін өз уақытын аямай, ұзақ жыл білім саласында қызмет етті.
Саналы ғұмырын ұстаздыққа арнаған Бейсенкүл Ахатайқызы қиын да күрделі мамандықты таңдап, мұғалім болды. Мұғалім болу үшін Қызылорда қаласындағы пегогикалық институтының жаратылыстану факультетінде химия-биология пәнінің мұғалімі мамандығына оқыды. Ұстаз еңбек жолында шәкірттерінің бойына осы пәнге деген қызығушылықты арттырумен қатар, пәнді жетік меңгертуге барын салды. Әріптестерімен тығыз қарым-қатынас орнатып, тәжірибесімен алмасты. Қоғам алдындағы жауапкершілікті терең сезінген ұстаз шәкірт алдына келгенде қарапайымдылықты жоғары қойды. Оқушымен тіл табысу, тәрбиемен қатар терең де сапалы білім беру мақсатына жетуге тырысты. Білікті ұстаздың өзге мұғалімдерден ерекше еткен қасиеті сыныпқа кіргенде оқушыларды түгендемейтіндігінде. Өткенді қайталау арқылы оқушыларды түгел қамтып, тақырыпты меңгергендерін нақтылап алып, қай оқушының қандай деңгейде ұғынғанын үш сұрақ қою арқылы бағалау педагогтың шеберлігі.
– Әкем Ахатай теміржолшы болды. Анам Шаһарбану үй шаруасында. Бес баланың үлкені ретінде бауырларыма үлгі болуға тырыстым. Ұстаздық мамандықты қалап, химия-биология пәнінің мұғалімі атанғанымда алдымда үлкен мақсат болды. Ол оқушының пәнге деген қызығушылығын арттыру, барынша пәнді үйрету. Оқушылардың жаңа сабақты меңгергеніне көзім жеткенде, төбем көкке жететін. Ештеңеге алаңдамай 45 минуттің ішінде 30 оқушымен бірдей жұмыс істеуге тырыстым. Мақтау сөздерін үнемі пайдаланып, тәртіпті алдыңғы кезекке қойдым. Оқушыға сенім білдіріп, қанаттандырып отырдым. Себебі, оқушының сеніміне ие болу – нағыз ұстазға тән қасиет. Осындай қасиетім мектепте директордың ісі жөніндегі орынбасары болған кезімде көп көмектесті, – дейді байырғы ұстаз Б.Ахатайқызы.
Ұзақ жылғы қызмет өз жемісін беріп, ұстаз есімі ұлықталды. Ардагер-ұстаз еңбек еткен жылдары мұғалімдердің ең жоғарғы марапаты ҚазССР, ССРО «Халық ағарту ісінің озық қызметкері» деген атағын алып, тәжірибесі республика көлеміне таратылды. Педагогикалық оқуда «Химия сабағында оқушыларға саяси патриоттық тәрбие беру» тақырыбында қорғалған еңбегі жоғары бағаланып, «Қазақстан мектебі» журналына жарияланды.
1987 жылы аудандық білім бөліміне әдіскер болып келді. Әдіскер ретінде химия-биология пәндерінен аудан мұғалімдерінің озық тәжірибесін тарату, тәжірибе алмасу мақсатында №35 орта мектеп мұғалімі С.Шамшадинованың облыстық, №130 орта мектеп мұғалімі Б.Аяпованың аудандық атаулы мектептерін ашты. №129 орта мектеп базасында Б.Базарбаеваның «Жаратылыстану негіздері» атты интеграциялық курсын ұйымдастыруына жетекшілік етті. Үздік ұстаздар жылына екі мәрте облыстан, ауданнан шақырылған әріптестерімен тәжірибе алмасып, сабақтары үлгі ретінде көрсетілді. Әріптестеріне басшылық жасаған Бейсенкүл Ахатайқызы ардагер-ұстаздар Б.Бисенбаева, Б.Алмағанбетова, Р.Бажиева, Ж.Бисенбаев, М.Мәмбетов, Ұ.Бәйімбетовалардың кезінде мықты ұстаз болуына себепкер болды, олардың есімдерін бүгінде құрметпен атайды. Сонымен қатар, осы күні аудандағы білікті ұстаздар Г.Ешмұратова, Ү.Батишева, А.Ерғалиеваның әдістемелік шеберлігін арттыру жұмыстарына атсалысқанын мақтанышпен айтады.
«Шәкіртсіз ұстаз тұл» демекші, қазіргі таңда ұстаздың шәкірттері облыста абыройлы қызмет етеді. Олардың арасында медицина саласын таңдап, дәрігер атанған Е.Нұртазаев, Ж.Ерғалиева, Г.Жүнісованың, ұстаздық мамандықты таңдаған Л.Нұржанованың ұлағатты ұстаздарына айтар алғыстары шексіз.
Бүгінде 70 жасқа келіп қалған ақ жаулықты ана, отбасында сүйікті отанасы, аяулы әже. Бейсенкүл апайдың перзенттерінің барлығы ақ халатты абзал жандар. Үлкен қызы Гүлсім облыстық көпбейінді ауруханада кардиология бөлімінің меңгерушісі, Ғалымжан санитарлық дәрігер, кенже қызы Салтанат та дәрігер атанды.
– Менің арманым дәрігер болу еді. Сол мақсатыма бүгінде балаларым жетті. Шүкір, әрқайсысы дәрігер деген атқа лайық болуы үшін барын салып, қызмет етуде. Білім саласындағы үлкен жетістігім – шәкірттерімнің жетістігі, ал өмірдегі шыққан шыңым балаларымның қуанышы. Қай кезде де оқушының алдына үлкен дайындықпен барып, сабақты үйретуде жалықпадым. Қатал да болдым, бірақ бұл оқушының білсем, үйренсем деген талабына қанат бітірген қасиетім болса керек. Қандай марапат алсам да оны құрметпен қабылдадым, – дейді қырық жылға жуық ұстаздық еткен ардақты жан.
Ауданның оқу-білім жолында өшпестей із қалдырған ұстаз осы күні жас мұғалімдерге ақыл-кеңес беруден шаршаған емес. Алдымен жинақылыққа, жауапкершілікке, қатаң талап қоя білуге, қойған талабының орындалуына бақылау жасауға үйрететін ұстаз бүгінде тың, қимылы ширақ.
– Бейсенкүл Ахатайқызы білім бөлімінің әдіскері ретінде мұғалімдерге көптеген әдістемелік көмек берді. Күнделікті сабағымызға қатысып, шыңдады. Оқушыларға тақырыпты меңгертудегі тәжірибесімен бөлісті. Жетістіктерімізді мақтап отырды. Кемшіліктерді жетілдіруге ақыл-кеңесін берді. Қазір отыз жылға жуық еңбек өтілімде жақсы мұғалім болып қалыптасуыма Бейсенкүл апайдың үлесі зор десем артық айтқандық болмас. Себебі, ұстаздардың ұстазы атанған ардақты жанның еңбегі біздер үшін ұшан-теңіз. Мамандығын шын сүйген ұстаз ретінде апайды құрметтейміз. Әлде де болса үйренуден жалықпаймыз, апайды төл мерекемен құттықтаймын, зор денсаулық, ұзақ өмір тілеймін, – дейді №36 Ә.Тәжібаев атындағы мектеп-лицей директорының оқу ісі жөніндегі орынбасары Г.Ешмұратова.
Білімін үздіксіз жетілдіріп, жаңашылдыққа ұмтылып, талай шәкірттің жүрегіне жол тапқан ардақты ұстаз белсенді өмір салтын ұстанады. Ол қол қусырып отыруды жаны қаламайды. Бүгінде шағын кәсіпкерлікті ұршықша иіріп отыр.
Бибісара ЖАНӘЛІ
