Редакция қызметкерлері вакцина қабылдады
Коронавирус инфекциясы аудан көлемінде өршіп тұрғанынан тұрғындар жақсы хабардар. Күн сайын жұқпалы дертке шалдығушылар қатары да көбейгенін күнделікті ақпарат көздерінен біліп отыр. Қауіпті вирустан сақтанудың жолы вакциналау екенін қазір тұрғындар біршама ұғынуда. Сондықтан жаппай вакциналауға жүгініп жатқандардың қатары да арта түсуде.
Жақында ауданға 2400 доза «Спутник V» және 600 доза «QazCovid-in» вакцинасы әкелінген болатын. Алдыңғы кезекте салғызған аудан тұрғындары вакцинаның кері әсері болмағанын айтып, халықты хабардар етті. Сондықтан вакцинаға деген сенім де арта түскені мәлім. Енді тұрғындар ерікті түрде жаппай вакцина қабылдауға асығуда. Бұл бірінші кезекте өз денсаулықтарына бей-жай қарамағандықтан және жұқпалы ауруға араша түсуге мүмкіндік береді деген сөз.
Кеше аудандық «Тіршілік тынысы» газетінің ұжымының қызметкерлері де қауіпті індетке қарсы вакцина қабылдады. Бас редактор бастаған ұжым қызметкерлері екпені қабылдаған соң біршама уақыт дәрігер бақылауында болды. Енді арада 21 күн өткен соң вакцинаның екінші компонентін қабылдайтын болады.
Бибісара ЖАНӘЛІ
