Тіршілік тынысы Tirshilik-tynysy.kz ақпараттық агенттігі
» » Қоғалыкөлдік оқушылардың жетістігі

Қоғалыкөлдік оқушылардың жетістігі

Аудандық мәслихат депутаты Сламбек Қаю­пов басқа­ратын Қоғалыкөл ауылын­дағы №44 орта мек­теп ұла­ғат­ты ұстаздар мен озат оқушы­лардың құт­ханасы. Білім ордасынан елімізге белгілі көп­теген түлектер түлеп ұшты. Олар­дың бүгінгі ізбасарлары да осал емес.
Жақында облыстық білім басқар­масының «Дарын» облыстық қосымша білім беру орталығының ұйымдас­тыруымен жалпы білім беретін пәндер бойынша респуб­ликалық олимпиа­даның ІІІ (облыстық) кезеңі өткізілді. Қызыл­орда қаласындағы «Мұрагер» мектебінің базасында ұйымдастырылған білім бәсе­кесіне қоғалыкөлдік оқушылар да қа­тысты. Ұстаздар сенімін, ата-ана үмі­тін арқалап барған озат оқушылар рес­публикалық олимпиаданың облыстық кезеңінде жүлделі орындарға ие болды. Бұл ізденістің, қажырлы еңбектің жемісі екені анық.
Айта кету керек, республикалық оли­м­пиаданың облыстық ке­зе­ңінде қазақ тілі мен әдебиеті пәні бойынша №44 орта мектебінің оқушысы Айдана Жалғас (жетекшісі Айнұр Талпақова) ІІІ орынды иемденді. Сонымен бірге биология пәні бойынша Арайлым Кенжебекқызы (жетекшісі Салтанат Ахметова) ІІІ орынға лайықты деп танылды. Оқушыларға диплом және медаль берілді.
– Мектебіміздің оқушылары аудандық, облыстық, республикалық білім байқауларында топ жарып келеді. Олардың сапалы білім алуына барлық жағдай жасалған. Сабақтан тыс уақытта қосымша білімімді жетілдіремін деген оқушыларға ұстаздар үйретуден жалыққан емес. Шәкірттеріміздің алдағы уақытта да биік белестерді бағындыратынына сенеміз, – дейді орта мектептің тәлімгері Самал Қоңырбаева.

Ақтөре ИБРАГИМҰЛЫ


14 қаңтар 2020 ж. 1 319 0