– Біз өзі сөзге жоқпыз, істің адамымыз, бауырым, – деп бас­тады Мәди бізбен әңгімесін. Сырт көзге жауырынды жігіттің епті екені көрініп-ақ тұр. Нағыз еңбек адамының бейнесі дерсіз. Мәди өзін төрт баланың әкесімін деп таныстырды. Қазір төрт баласы барлар көпбалалы отбасы болып саналады. Баланың аз немесе көптігі азаматтың еңбек етуіне тікелей байланысты болмаса да отбасының ырысын Жер-Анадан терген жігітағасының талабына сүйсіндік.

– Аллаға шүкір, былтыр екі тақтаға картоп егіп, 30 қаптай өнім алдық. Оны өзіміз тамаққа тұтындық. Қалғанын етжақын ағайынға кеусен ретінде үлестірдік. Артылғанын саттық. Әйтеуір еңбегіміз еш кеткен жоқ. Жергілікті әкімдікке рақмет. Олар бізге жер ашып беруге, су жеткізуге көп көмектесті. Бағдат Жақсылықұлымен сөйлессем, бұл іс биыл да жалғасады екен. Кетпен-күрегімізді дайындап, күннің жылынғанын күтіп отырмыз, – дейді Мәди Раймов.

Еңбексүйгіш азаматпен әңгімелесу барысында іске де епті, сөзге де шешен екенін аңғардық. Жылы жымиып алып әріден сөз бастағанда нағыз дала қазағына ұқсайды. Айтуынша, мал шаруашы­лығымен де айналысады екен. Одан бөлек аң аулауға да құмар екенін айтты.

– Төле биден «Азаматтың жақсысы қайсы?» деп сұрағанда, көпті көрген көреген би бабамыз «Адал еңбекті ту еткені» деп жауап беріпті. Еңбек ету – ырысты, берекені арттырады. Сондықтан масыл­дық­қа бой алдырмау керек. Ерте тұрып, кеш жатқаннан жаман болған адамды көргенім жоқ, – деп аяқтады еңбексүйгіш азамат өз пікірін.

Біз де талабын тау көрген жігітағасына зор денсаулық тілеп, еңбегінің жемісті болуына тілектестігімізді білдірдік. Лайым, Мәдидей азаматтар көп болса, уақытын адал еңбекке арнаса, мол өнімге кенеліп, оны өзі де тұтынып, өзгеге де үлестірген отбасылардың саны артар еді.