ӨНЕРІМЕН ОЗҒАН ЖОМАРТ
“Жаста берген тәрбие жас шыбықты игендей” дейді халық даналығы. Сол айтқандай үйде ата-анасының, мектепте ұстаздарының тәлім-тәрбиесін жадына тоқыған Жомарт бастауышта жүргенде-ақ түрлі өнерді игеруге ұмтылды. Талабы таудай баланы отыз жылдан астам ән сабағынан дәріс беретін білікті ұстаз Үміткүл Дабылқызы Ерназарова қанатының астына алып, өнеріне ұштады. Осы ретте кент орталығындағы №210 орта мектебінің 8 сынып оқушысы Жомарт Наршаев тек вокал ғана емес өнердің түр-түрін жақсы меңгерген. Ол домбыраның құлағында ойнайды. Шығарма жазғанда да шеберлік танытады.Үздік оқушы Ж.Наршаев өткен жылдың қыркүйегінде Қызылорда қаласында өткен республикалық байқауда вокал жанрынан бас жүлдені жеңіп алып, Халықаралық байқауға жолдама алған болатын. Сол Халықаралық байқау Алматы қаласында “Ұлы дала ұрпағымыз” деген атаумен ұйымдастырылды. Еліміздің барлық облысы мен үлкен қалаларынан қатысқан мыңға жуық үміткердің арасынан суырылып алға шығып, вокал және домбыра номинациялары бойынша І дәрежелі дипломмен марапатталды. Тәлімгері Үміт Дабылқызы алғыс хатқа ие болды. Жомартқа вокалдан Ү.Ерназарова дәріс берсе, домбырадан аудандық әуез мектебінің мұғалімі Қуаныш Жүнісов тәлім береді. Шәкірт пен ұстаздарға жеңістеріңіз құтты болсын, жалғасын таба берсін дейміз.
Ш.НҰРСЕЙІТОВ
