Ана тілі тұғырында тұрады

Сырдария ауданында ана тілінің мәртебесін көте­ру мақсатында маңызы зор іс-шаралар жалғасын табуда. Бұл рет­те, Халықаралық «Қа­зақ тілі қоғамы» қо­ғамдық бірлестігінің аудандық филиалы, аудандық мәдениет және спорт бөлімі жә­не Терең­өзек кенті мәде­ниет үйінің бірлесіп ұйымдастыруымен «Тіл –­ елдігімнің тірегі» тақы­ры­бында танымдық кеш өткізілді.

Тағылымы мол іс-шарада Халықаралық «Қазақ тілі қоғамы» қоғамдық бірлестігінің аудандық филиалының төрағасы Шаһарбек Нұрсейітов 2023 жылдың 5 айында атқарылған жұмыстарға тоқталды.

– Халықаралық «Қазақ тілі қоғамы» қоғамдық бірлестігінің аудандық филиалының жұмысы күннен-күнге жанданып, ана тілінің қолдану аясын кеңейтуге бірнеше жоба жүзеге асырылуда. Қашанда қазақ тілінің мәртебесін биіктету үшін танымы бөлек, тағылымы орасан іс-шаралар өткізуді қолға алудамыз. Бізді әрқашан білім, денсаулық сақтау, аудан әкімдігі, дербес бөлімдер мамандары қолдап отырады. Сонымен бірге «Шаған Жер» ЖШС-нің төрағасы Жеңісбек Сыздықовтың орасан зор демеуін сезініп келеміз. Баспасөзге жазылу науқанында аталған сала өкілдері белсенділік танытады. Мектеп қабырғасынан жастардың ана тілімізді жетік меңгеруіне білікті ұстаздар барын салуда. 2023 жылдың 5 айында қазақ тілінің мемлекеттік мекеме мен кәсіпкерлік нысандарында дұрыс жазылуына қатысты бірқатар рейд өткізілді. Заң аясында жеке кәсіпкерлерге түсіндірме жұмысы жүргізілді. Ерекше айта кетейік, «Зерде» дәріханасы дәрі тұратын сөрелерді қазақ тіліндегі атаулармен жазып қойған. Біз бизнес иесінің тілге деген жанашырлығын анық байқадық, – деді Шаһарбек Нұрсейітов.

«Тілде тұтас ұрпақтың ғасыр­лық еңбегі бар» дегендей, ғасыр­лар бойы рухани құндылық­тың діңгегі саналатын тіл ешқашан тұғыры­нан таймауы тиіс. Аталған кеште ән айтылып, би биленді. Сонымен бірге тіл жанашырлары марапатталды.

Б.ОРДАБЕКОВ