Тіл жанашырлары марапатталды

Аудан көлемінде «5 қыркүйек – Қазақстан халқы тілдері күні» мерекесі мен ұлт ұстазы Ахмет Байтұрсынұлының туғанына 150 жыл мерейтойына арналған іс-шаралар бір айы бойы жалғасын табуда. Қос мереке аясында аудандық мәдениет және тілдерді дамыту бөлімінің басшысы Жеңісбек Төрәлиев пен халықаралық «Қазақ тілі қоғамының» ҚБ Сырдария аудандық филиалының төрағасы Шаһарбек Нұрсейітов «Шаған-Жер» ЖШС-нің ұжымымен кездесті.

Күзгі егін жинау науқанына кіріскен шаруалармен кездесуде мемлекеттік тілдің мәртебесін көтеру мә­селесі айтылды. Бес мыңға жуық халқы бар Шаған ауы­лында қазақ тіліне деген құрмет ерекше. Мәселен, «Шаған-Жер» ЖШС жанынан құрылған «Қазақ тілі қо­ғамы» бастауыш ұйымының жұмысы жанданып келеді. Іс-қағаздар құжаттарын ана тілімізде жазу, тағылымға толы іс-шаралар өткізуге көңіл бөлу керектігі басты на­зарға алынған.

Өз кезегінде меймандар халықаралық «Қазақ тілі» қоғамы президентінің «Құрмет грамотасын» «Шаған-Жер» ЖШС-нің төрағасы Жеңісбек Сыздықов пен шаруашылықтағы «Қазақ тілі қоғамының» бастауыш­ ұйымының төрағасы Әлібек Жансейітовке тапсырды. Ұжым алдында мерейін өсірген сала басшыларына ша­руа­шылық төрағасы өз алғысын жеткізді. Сонымен бірге қазақ тілінің қолдану аясын кеңейтуге, барлық жобаны жүзеге асыруға қолдау көрсететіндігін жеткізді.

– Қай кезде де ұлттың басты құндылығы ана ті­ліміздің тұғырын биік ету үшін барымызды саламыз. Биыл 150 жылдық мерейтойы кеңінен тойланып жатқан ағартушы Ахмет Байтұрсынұлы «Тілі жоғалған ұлттың, өзі де жоғалады» деген болатын. Қамбасы астыққа толы іргелі ұжымның егінді шашпай-төкпей жинап алуы­­на тілекшіміз. Сіздердей қолдаушылардың арқасында зор табысқа жете бермекпіз. Жоғарғы ма­рапат алған басшылық құрамды шын жүректен құттық­таймын, – деді аудандық мәдениет және тілдерді дамыту бөлімінің басшысы Жеңісбек Төрәлиев.

Балтабай Аябекұлы