Көркем сөз шеберлері биіктен көрінді
Жыл басынан бері Алаш қозғалысының қайраткері, ақын, қазақ әдебиетінің көрнекті өкілі Мағжан Жұмабаевтың туғанына 130 жыл толуына орай ауқымды іс-шаралар жүзеге асуда. Өз кезегінде аудандық мәдениет және спорт бөлімі және Нағи Ілиясов ауылдық округі әкімшілігінің қолдауымен, ауылдық мәдениет үйінің ұйымдастыруымен атаулы күнге арналған «Алаштың сөнбес жұлдызы» тақырыбында аудандық көркемсөз оқу шеберлерінің байқауы өткізілді.Ауданға қарасты Тереңөзек кенті мен бірнеше елді мекеннен келген 11 қатысушы байқауда бақ сынады. Көркемсөз оқу шеберлері бірінші кезеңде ақын Мағжан Жұмабаевтың өлеңдерін мәнерлеп оқыды. Ал екінші кезеңде сан алуан ақынның туған жер туралы жазған туындысын көпшілік назарына ұсынды. Өнерлі өрендердің шығармашылық әлеуетін аудандық «Тіршілік тынысы» газетінің тілшісі Балтабай Ордабеков, ауылдық мәдениет үйінің ардагері Күлаш Құдабаева, №132 Т.Айтбаев атындағы орта мектептің қазақ тілі мен әдебиеті пәнінің мұғалімі, «Мектеп және театр» жобасының жетекшісі Салтанат Кенебаева саралап, қазылық етті.
– Шын мәнінде, тарихта есімі мәңгі сақталатын қазақтың біртуар тұлғалары жетерлік. Қазақ жастарының болашағына сеніп, руханиятты өркендетуге зор үлес қосқан Мағжан Жұмабаев есімі барынша ұлықталғанына бек қуаныштымын. Жас ұрпақтың санасына ақынның өлеңдерін сіңіріп, келешек әдебиеттің шын жанашырларын тәрбиелеуіміз керек. Біз талантты балалардың өнерін, қабілетін шыңдап, нағыз майталманға айналдырғанымыз дұрыс. Бұл ретте, байқауға қатысқан көркемсөз оқу шеберлері өз деңгейінде өнер көрсетіп шықты, – деді Нағи Ілиясов ауылдық ардагерлер кеңесінің төрағасы Төребек Жұмабеков.
Байқау қорытындысында бас жүлдені жетікөлдік Бақдәулет Нақыпбек, І орынды қоғалыкөлдік Тоғжан Жүнісқызы, ІІ орынды шіркейлілік Бегімай Рүстемова, ІІІ орынды ақжармалық Ақмаржан Нұрболатқызы еншіледі. Барлық байқау жүлдегері мен қатысушыға диплом, Алғыс хат және қаржылай сыйлық табысталды.
Аружан Амантай,
Қорқыт ата атындағы Қызылорда университетінің журналистика
мамандығының 3 курс студенті
