Өлмейтұғын артына сөз қалдырған

«Адамды адам еткен − кітап, адамзат еткен – кітапхана» деген Әбіш Кекілбаев рухани құндылығымыздың айнасы кітапхана екендігін дөп баса айтқан. Осы орайда аудандық орталық кітапханасы ұжымының атқарып жатқан жұмысы орасан. Орталық кітапхана мамандары қазақтың ұлы ақыны, ағартушы, ойшыл Абай Құнанбайұлының 175 жылдық мерейтойына жыл көлемінде 90-нан аса шара ұйымдастырған болатын. Сол шараларды қорытындылау мақсатында «Абай мұрасы − мәңгілік мұра» тақырыбында мәдени шара өткізілді.

Шара шымылдығын ұйымдастырушылар «Абай және XXI ғасырдағы Қазақстан» та­қы­рыбындағы кітап көрмесімен түрді. Кі­тап көр­месі ақынның өмірі мен отбасы, лири­калық өлеңдері, қара сөздері, аудармалары, му­зыкалық әлемі мен Абай Құнанбайұлын зерт­теген ғалымдарға арналған алты бө­лімді қамтыды. Ал екінші бөлім әдеби кеш­ке ұласып, ақынның қара сөздері мен өлең­дері оқылды. Жергілікті сазгер Махмуд Сақ­таповтың сүйемелдеуімен, жас әнші Динара Жәкешова ақынның әні мен сөзіне жазылған «Желсіз түндей жарық ай», «Көзімнің қарасы» әндерін жанды дауыста шырқады.

Өз кезегінде сала мамандары «Абайдың өмірінің бір сәті» атты көрініс қойды. Та­ғы­лымға толы көріністе ақынның әкесі Құнанбай, әжесі Зере мен анасы Ұлжанның ара­сындағы диалог өрбіді. Хәкім Абайдың бойындағы тектілік үлгісі болған, тәрбиенің бастау бұлағына айналған жандардың образы сахналанды.

Аудандық орталық кітапхананың дирек­торы Г.Нұржакиева қорытынды сөзінде:

− Дана Абай Құнанбайұлының жүріп өткен сара жолын бір кешке сыйғыза алмасымыз анық. Ұлы тұлғаның тағылымды өмір тарихын оқырманға таныстыру мақсатында жыл көлемінде ауданның 17 кітапханасымен бірлесе отырып, 92 шара өткіздік. Елдегі пандемия режиміне байланысты басты бөлігі онлайн түрде ұйымдастырылды. Дегенмен, біз мұнымен тоқтап қалмай, кемеңгердің құрметіне өткізілетін біршама жобаларды жоспарлап отырмыз, − деді.

Шарада аудандық мәдениет және тілдерді дамыту бөлімінің бас маманы Ердәулет Утебаев, музей қызметкері Әлия Түлкібаева ақын мұрасының мәңгілік өшпес құндылық екендігін айтып, кемеңгердің ұлағатты сөздерін тілге тиек етті.

Әдеби кеш соңында «Абайды білмек парыз» атты әдеби-лото ойнатылып, ақын өмірінен алынған әр сұраққа дұрыс жауап берген қатысушыға кітап сыйға берілді.

Жұлдызай АНШАЕВА